Ерөнхий сайд Л.Оюун-Эрдэнэ зөвлөхүүдээ томилжээ. Тодруулбал, Хууль зүйн бодлого хариуцсан зөвлөхөөр БШУ-ны сайд асан Л.Цэдэвсүрэн, Олон нийт, хэвлэл мэдээлэлтэй харилцах зөвлөхөөр А.Амундраг, Эдийн засгийн бодлого, төсөл хөтөлбөрүүдийг хариуцсан зөвлөхөөр Т.Хаш-Эрдэнэ нарыг томилсон байна.

Хууль зүйн бодлого хариуцсан зөвлөх Л.Цэдэвсүрэн гэж хэн бэ

Тэрбээр ОХУ-ын Эрхүү хотын Их сургуулийн Хуулийн факультет, Монгол Улсын Их сургуулийн Хууль зүйн сургууль, Удирдлагын академийн Төрийн удирдлагын сургуулийг төгссөн Эрхзүйч, Төрийн удирдлагын менежер, Хуулийн магистер цолтой. Орос, Англи хэлний мэдлэгтэй. 1996-2000 онд Гэгээрлийн яаманд хуулийн зөвлөхөөр, 2000 оноос БСШУСЯ-нд хуулийн хэлтсийн даргаар, төрийн нарийн бичгийн дарга, БШУ-ын сайдаар тус тус ажилласан. Тэрбээр төрийн албанд 25 жил ажиллажээ. 

Олон нийт, хэвлэл мэдээлэлтэй харилцах зөвлөх А.Амундра гэж хэн бэ

А.Амундра нь 2007 онд “News.mn” төслийг санаачлан медиа салбарт үйл ажиллагаагаа эхлүүлсэн бөгөөд 2009 оноос “Боловсрол суваг” телевизийн Гүйцэтгэх захирлаар ажиллаж улмаар “Монгол масс медиа” группийг 2010 оноос хойш тасралтгүй удирдаж өдгөө мэдээ, мэдээллийн төрөлжсөн “Монголын медиа корпораци”, контент үйлдвэрлэлийн “Гэр” контент групп, онлайн болон телевизийн худалдааны “Шууд” суваг бүхий олон талын үйл ажиллагаатай Монголын тэргүүлэх медиа групп болгож өргөжүүлсэн нэгэн юм. “Монгол масс медиа” группийн ТУЗ-ын даргаар сонгогдон ажиллаж буй нэгэн.

Эдийн засгийн бодлого, төсөл хөтөлбөрүүдийг хариуцсан зөвлөх Т.Хаш-Эрдэнэ гэж хэн бэ

Тэрбээр 2017 оноос Монгол Улсын Ерөнхий сайдын орон тооны бус зөвлөхөөр, 2018-2021 онд Ерөнхий сайдын дэргэдэх Эдийн засгийн бодлогын зөвлөлийн Ажлын албаны даргаар ажилласан байна. Түүнчлэн Монгол Улсын дунд, урт хугацааны хөгжлийн бодлого, төр, хувийн хэвшлийн хамтын ажиллагаа, банк санхүүгийн салбарын асуудлаар Засгийн газарт бодлогын зөвлөгөө өгөх, дэмжлэг үзүүлэх үндсэн чиг үүрэгтэй зөвлөлийн үйл ажиллагааг хариуцан ажиллахаас гадна “Алсын хараа 2050 - Монгол Улсын урт хугацааны хөгжлийн бодлого” боловсруулах Эдийн засгийн дэд ажлын хэсэгт гишүүнээр ажиллажээ.

Р.Алтан