Манай улс АстраЗенека вакцины 150 мянган хүн тунг Энэтхэг улсаас хүлээн авлаа.  Оксфордын АстраЗенека вакцины эхний татан авалтын нислэг Чингис хаан ОУ-ын нисэх буудалд өнөөдөр өглөө 06:40 цагт газардсан байна.

Тус вакциныг БНЭУ-аас Монгол Улсад суугаа Элчин сайд М.П.Сингх манай улсад буцалтгүй тусламжаар өгч буй юм. Уг вакциныг хүлээлгэн өгөх ёслолын арга хэмжээ боллоо. 

Энэ үеэр БНЭУ-аас Монгол Улсад суугаа Элчин сайд М.П.Сингх "Энэтхэг Улс нь КОВИД-19- ийн эсрэг вакциныг бидний “оюун санаа хөрш”, “Стратегийн түнш” болох Монгол Улсад өгч байгаа анхны улс болж байгаадаа баяртай байна. Энэтхэг Улс нь эхний ээлжинд 6.3 сая тун вакциныг 13 найрсаг түнш орнуудад бэлэглэж буй бөгөөд энэ нь бидний зүрх сэтгэлийн холбоо, найрсаг харилцаа, хамтын ажиллагааны илэрхийлэл болохын зэрэгцээ “Act East” бодлогод Монгол Улсын чухал ач холбогдлыг харуулж байгаа юм” гэв. 

Харин Монгол Улсын Шадар сайд С.Амарсайхан "Энэтхэгийн Ерөнхий сайдад Монгол улсыг 150 мянган Ковидын вакцинаар хангаж буй орнуудын жагсаалтын эхний эгнээнд оруулсанд талархал илэрхийлж, өнөөдрийн арга хэмжээ түүхэнд тэмдэглэгдэх болно. Мөн Энэтхэг, Монголын стратегийн түншлэл өргөжиж Монгол, Энэтхэгийн ард түмний найрамдлыг бэхжүүлэх чиглэлээр олон салбарт хамтарсан төсөл, хөтөлбөрүүд амжилттай хэрэгжиж байна. Вакциныг хуваарийн дагуу оруулж ирүүлнэ. Эхний ээлжийн вакцин орж ирсэнд баяртай байна. Эхний ээлжийг вакциныг эрүүл мэндийн салбарынхан болон цагдаа, онцгойгийнхныг хамруулна. Энэ оны хоёрдугаар улиралдаа багтаагаад вакцинжуулалтын ажлыг хийж дуусгана гэсэн төлөвлөгөөтэй байгаа” гэлээ. 

Ташрамд өгүүлэхэд, Дархлаажуулалт маргааш эхлэх бөгөөд Ерөнхий сайд Л.Оюун-Эрдэнэ анхны тунг морин цагт хийлгэх юм.

Б.Баатар