МАХН-ын дарга Н.Энхбаяртай уулзах хүсэлтэй хүмүүс өдөр бүр шахуу Шүүхийн шийдвэр гүйцэтгэх ерөнхий газарт өргөдөл гаргадаг гэнэ. Хуулийн дагуу тэд хүссэн болгонтой нь уулзуулдаггүй. Харин Н.Энхбаяртай уулзахыг хүсэгчдийн тоонд МАН-ын шинэ генсек Г.Занданшатар багтсан нь олон нийтийн сонирхлыг татаад байна. Тэрбээр МАН-ын ерөнхий нарийн бичгийн даргаар томилогдоод удаагүй байгаа ч нэгэн том алхам хийхээр зэхэж байгаа бололтой. Г.Занданшатарыг яагаад Н.Энхбаяртай уулзахыг хүссэн талаар эх сурвалжууд олон янзын таамаг дэвшүүлж, нэрлэж байна.

  Сүүлийн үед МАН-ын энгийн гишүүд МАХН-руу зуу, зуугаараа орж байгаа нь МАН-ын хүчийг бага багаар сорж байх шиг. Хэдийгээр 200 мянга гаруй гишүүнтэй гэх энэ том намд бага тоо ч МАН өнөөдөр ямар байдалтай байна вэ гэдгийг нэг талаас харуулаад байгаа хэрэг. МАН-ын тархи нь гоожиж эхлээгүй ч, цус нь дусалж байх шиг. О.Баасанхүү гишүүн ч “МАН, МАХН хоёр аяндаа нэг цул болох ёстой” гэж хэлснээс тэд хэр бардам байгааг харж болох юм. Засгийн газарт орсон, эрх баригчдын “хамсаатан” болсон гишүүдийн хэлдэг л үг. Тиймээс Г.Занданшатар намаа нэгтгэе гэж хэлж чадахгүй ч “гоожсоор” байгаа гишүүдийнхээ асуудлыг Н.Энхбаяртай ярилцах шалтгаан түүнд бий.

   Хоёрт, МАН-ынхан наанаа “бүлэг байгуулсангүй” гэж нулимс унагах шахаж байгаа ч энэ бол өнгөн тал юм. Тэдний хамгийн их шаналгаж, толгойн өвчин болж байгаа нь Орон нутгийн сонгууль. Тэд УИХ-ын сонгуулийг “алдсан”. Тиймээс Орон нутгийн сонгуульд олигтой оролцож чадахгүй бол дахин сэхнэ гэдэг хүнд асуудал болно. Иймээс МАН-ын удирдлагууд Н.Энхбаяр дээр хадаг, сүү барин “Орон нутгийн сонгуульд хамтран оролцъё” гэж сүй бэлэг тавихыг үгүйсгэхгүй. МАХН бол орон нутагт үнэхээр хүчтэй нам гэдгийг хэн хэн нь мэдэж байгаа, үүнийг нуудаггүй. УИХ-ын сонгуулийн үеэр Н.Энхбаярыг хотоос гаргахгүй гэж хорьсон нь түүнийг хөдөө очоод бужигнуулна гэдгийг мэдсэн хэрэг гэж олон хүн тааж байсан. Тиймээс МАХН-тай хамтарч Орон нутгийн сонгуульд оролцвол МАН-ын хувьд том найдвар болох юм. Гэхдээ Н.Энхбаяр бол тийм ч амар барж идэх “хоол” биш. Анх “Шударга ёс эвсэл” АН-тай гэрээ байгуулахад Х.Баттулга: "Эвслийн цаасан дээр буусан гэрээг дөрвөн жил тогтвортой байлгахын тулд бид Орон нутгийн сонгууль болон Ерөнхийлөгчийн сонгуульд нэг субьект болж оролцоно” хэмээн мэдэгдэж байв. Тиймд энэ хэлэлцээрээсээ буцна гэдэг бас л алга урвуулахын хооронд хийх зүйл биш.

   Харин удаах шалтгаан нь гэвэл Г.Занданшатар бол сонгуульд “унасан” намаа сэргээх гэж гарч ирсэн хүн. Тиймээс шинэ генсекийн эр зоригоо харуулах боломж энэ юм. Яагаад МАН-ын дарга Ө.Энхтүвшин биш Г.Занданшатар Н.Энхбаяртай уулзахыг хүссэн нь сонин. МАН-д өөрчлөлт хийх шинэ удирдагч хэрэгтэй гэх үг олон гишүүдийнх нь амнаас унаж байсан. Тэгвэл Г.Занданшатар Н.Энхбаяртай ямар нэгэн ашигтай тохироо хийж чадвал “баатар” болно. Улс төрийн хувьд цаг нь залуухан байгаа түүний хувьд өөрийнхөө орон зайг нэмэх боломж энэ болох гэнэ.
   МАН-ын шинэ генсект Н.Энхбаяртай уулзах ийм гурван шалтгаан байна. Цаана өөр олон ч байж болох юм. Гэхдээ эхлээд Н.Энхбаяртай уулзаж чадах уу гэдэг нэг том давааг давах хэрэгтэй. Хүргэн хүү хүчтэй гэдэг шиг шинэ генсекийн хүч энд харагдах вий.