Монгол Улс БНХАУ-аас коронавирусийн халдварт цар тахлын эсрэг 300 мянган тун вакциныг хүлээн авлаа. Тус вакциныг хүлээн авах ёслолын ажиллагаанд монголын талаас Монгол Улсын Шадар сайд, Улсын онцгой комиссын дарга С.Амарсайхан, Эрүүл мэндийн сайд С.Энхболд, Батлан хамгаалахын сайд Г.Сайханбаяр, Гадаад харилцааны яамны Төрийн нарийн бичгийн дарга Н.Анхбаяр, хятадын талаас БНХАУ-аас Монгол Улсад суугаа Элчин сайд Чай Вэньруй зэрэг албаны хүмүүс оролцов. 

Энэ үеэр Шадар сайд С.Амарсайхан "БНХАУ-ын Засгийн газар, ард иргэдээс олон удаагийн тусламжаар хандивласан эмнэлгийн хэрэгсэл, төхөөрөмжүүд манай улсын "Ковид 19" цар тахалтай тэмцэх үйл ажиллагаанд чухал дэмжлэг болж ирсэн. БНХАУ-ын Засгийн газар вакцины дэмжлэг үзүүлж буйд баяртай байна. Саахалт айлын санаа нэг гэдэгчлэн хөрс орнуудын вакциныг авч хэрэгжүүлэх ажлыг бодлогоор дэмжинэ" гэв. 

БНХАУ-аас Монгол Улсад суугаа Элчин сайд Чай Вэньруй "БНХАУ-ын Засгийн газраас бэлэглэсэн вакциныг хүлээлгэн өгч буйдаа баяртай байна. Цар тахал гарснаас хойш манай хоёр улс үргэлж бие биедээ тусалж дэмжиж иржээ. Энэ хүнд хэцүү цаг үед бие биенээ ойлгож, Монгол Улс 30 мянган хонь бэлэглэсэн. Үүнд бид маш их баярлаж байдаг. Тиймээс ч өнөөдөр энэхүү вакциныг гардуулан өгч байна. Хэдийгээр вакцины хүрэлцээ тийм ч хангалттай биш байгаа ч БНХАУ-ын тал Монгол Улсад вакцин хандивлаж байгаа нь бидний найрсаг харилцааны илэрхийлэл юм. Цаашид хоёр улсын стратегийн харилцааг илүү өргөжүүлж, харилцан ашигтай хамтын ажиллагааг өндөр түвшинд гаргахын төлөө хамтран ажиллахад хэзээд бэлэн байх болно" гэлээ. 

Эрүүл мэндийн сайд С.Энхболд, "БНХАУ-ын Синофарм вакциныг эмнэлзүйн гуравдугаар шатлалыг давсан. ДЭМБ гуравдугаар сард зөвшөөрөл гарах мэдээлэл байгаа. Тиймээс бид зөвшөөрөл гартал хадгалж байгаад зөвшөөрөл гарсан үед дархлаажуулалтад хэрэглэнэ" гэв.  

Ташрамд өгүүлэхэд, Синофармын энэ вакциныг одоогоор бизнесийн зорилгоор 20 гаруй улсад экспортлож байгаа аж. БНХАУ-ын Синофарм компани, Бээжингийн биотехнологийн хүрээлэнгийн хөгжүүлсэн Verocell вакциныг яаралтай нөхцөлд хэрэглэх зөвшөөрөл олгох асуудлыг ДЭМБ судалж байгаа бол Монгол Улсын ЭМЯ-ны харьяа Хүний эмийн зөвлөл энэхүү вакциныг яаралтай нөхцөлд хэрэглэх зөвшөөрлийг олгоод байна. Энэхүү вакцин нь 18-59 насныханд тарихад тохиромжтой аж.

Б.Баатар