2020 оны тавдугаар сарын 25-наас мөрдөж эхэлсэн Үндсэн хуулийн нэмэлт өөрчлөлтөд Ерөнхийлөгчтэй холбоотой оруулсан заалтууд өдгөө маргааны эхлэлийг тавиад байна. Өмнөх, өдгөөгийн Ерөнхийлөгчид нэр дэвших эрхтэй, эрхгүй гэсэн талцал өнөөдрийг хүртэл үргэлжилж, харин энэ талаар АН-ын лидер З.Энхболд “Тэр битгий хэл, төрийн тэргүүн асан Намбарын Энхбаяр ч 2021 оны Ерөнхийлөгчийн сонгуульд нэр дэвших эрхтэй” хэмээн зарлалаа.

Үндсэн хуулийн нэмэлт өөрчлөлтөд өмнө нь 45 нас хүрсэн хүн Ерөнхийлөгчид нэр дэвших эрхтэй байсан бол насны энэ босгыг 50 болгосон.  Ерөнхийлөгчийн бүрэн эрх дөрвөн жил байсныг саяын өөрчлөлтөөр зургаа болгосон. Өөрөөр хэлбэл, 2021 оноос эхлэн Монгол Улсын Ерөнхийлөгчөөр 50 нас хүрсэн хүн зургаан жилийн хугацаатай зөвхөн нэг удаа сонгогдоно. Энэ нь зарим хүний хэлж байгаа шиг одоо ажиллаж буй Х.Баттулга Ерөнхийлөгчийн дахин сонгогдох эрхийг хаасан, хассан заалт биш. 2021 оноос хуулийн шинэ орчин үйлчилж эхлэх учраас Үндсэн Хуулийн шалгуур, шаардлагыг  хангаж л байвал Х.Баттулга ч, Н.Энхбаяр ч Ерөнхийлөгчид нэр дэвших эрхтэй гэдгийг З.Энхболд тодотгож байна.

Тиймээс 2021 оны Ерөнхийлөгчийн сонгуульд өрсөлдөх санаархлаа нууж чадахгүй байгаа Ерөнхийлөгч Х.Баттулга, МАХН-ын дарга Н.Энхбаяр, АН-аас нэр дэвшихээ хэдийнэ зарласан Ц.Оюунгэрэл, МАН-аас нэр дэвших боломжтой хэмээн мэдэгдсэн Ө.Энхтүвшин нарын зургаан эрхэм, тэр дундаа “нууц хөзөр” гэгдэж байгаа МАН-ын дарга У.Хүрэлсүх гээд бүгдэд энэ эрх тэгш гэж ойлгогдохоор байна. 

Харин одоогийн Ерөнхийлөгч Х.Баттулгын хувьд дахин сонгогдвол Монгол Улсын түүхэнд хоёр сонгогдоод 10 жил ажилласан анхны Ерөнхийлөгч болох юм.

У.Тэргэл