УИХ-ын гишүүн Л.Энх-Амгаланг  Боловсрол, шинжлэх ухааны сайдаар томилоод хорь гаруй хонож байгаа ч  тэрбээр салбарынхандаа сэтгэл дундуур байгаагаа ил тодоор мэдэгдлээ.

Манай улсын нийт төсвийн 15,7 хувь буюу 1,7 их наяд төгрөгийг тус салбарт хуваарилдаг байна. Гэвч энэхүү хөрөнгө, мөнгийг дэндүү үр дүнгүй зарцуулж, гарынхаа салаагаар урсгаж ирсэн талаар Л.Энх-Амгалан сайд хэлж байна. ДНБ-ий 6,6 хувьтай тэнцэж байгаа энэ том хөрөнгө оруулалт хаашаа явж байна вэ.

Хамгийн ноцтой нь, нэг төслөөр гурван удаагийн санхүүжилт авсан, нэг судалгааг нэрийг нь өөрчлөөд гурван өөр судалгаа болгон мөнгө авсан тохиолдол нэг бус нэжгээд илэрчээ.

Цаашлаад маш их хэмжээний газар, өмчийг хулгайлсан талаар ч сайд ам алдлаа. Тиймээс одоо бүртгэлжүүлж, цаашдаа энэ салбарт байгаа өмчийн ашиглалт, менежментийг шинэ шатанд гаргах ёстой гэдгийг БШУ-ны сайд хэлж байна.

БШУ-ны харьяа  Шинжлэх ухаан технологийн санг анх 1993 онд байгуулж байжээ. Энэ цагаас хойш нийт 184 тэрбум төгрөгийн санхүүжилт олгож, судалгааны 5000 орчим бүтээлийг санхүүжүүлсэн ч  өнөөдрийг хүртэл хийж, хэрэгжүүлсэн зүйл юу байна.

Монгол Улсын өрсөлдөх чадвар, эдийн засгийн өсөлтөд ямар хувь нэмрээ оруулав. Энэ талаар салбарынхнаас хариулж чадах нэг ч хүн байхгүйг сайд шүүмжлэв. Их, дээд сургууль, хүрээлэн, академи гээд тал тал тийшээ хараад суучихсан, хамтран ажиллах сэтгэлгээ байхгүй, адил тоног төхөөрөмжийг нэгнээсээ өрсөн худалдан авдаг зэрэг хууль зөрчсөн ноцтой үйлдэл энэ салбарт бугшжээ.  

У.Тэргэл