Монгол Улсад улс төрийн нам үүсэн байгуулагдсаны 100 жилийн ой энэ онд тохиож байгаа. Энэ ойгоо МАН ирэх сарын 1-нд тэмдэглэх гэж байгаа. Энэ ойн үеэр МАН, МАХН хоёр нэгдэж магадгүй байгаа тухай улс төрийн хүрээнд аль хэдийнэ яриад эхэлжээ.

МАХН-ын дарга Н.Энхбаяр 25 дугаар суваг телевизийн ярилцлагад орохдоо “Хоёр нам нэгдэх тухай асуудал зөвхөн дарга нарын шийдэх зүйл биш. Дарга ирнэ, явна, солигдоно. Харин гишүүд, дэмжигчид бол байж л байна. Н.Энхбаяр, У.Хүрэлсүх гэдэг хүн намаа нэгтгэх эсэх талаар гишүүд дэмжигчдээсээ асууж шийдэх хэрэгтэй.

МАХН бол миний хувийн нам биш. Тиймээс хоёр нам нэгдэх эсэхийг намуудын анхан шатны байгууллагууд хуралдаж, ард түмний санал асуулга явуулсны үндсэн дээр шийдэх хэрэгтэй. Хэрэв ард түмэн 100 жилийн ойгоороо нэгдэх хэрэгтэй гэвэл нэгдэх л ёстой.

Зүүний үзлээ баталгаажуулж, ярьж байгаа зүйлээ хэрэгжүүлж, байгалийн баялагаа ард түмэндээ өгөх зэрэг том зорилгын төлөө нэгдэх хэрэгтэй. Ширээ сандал хуваахын төлөө биш, гаж тогтолцоог засахын төлөө, зүүний үзлээ хэрэгжүүлэхийн төлөө нэгд гэж гишүүд, дэмжигчид хүсч байвал нэгдэхээс өөр аргагүй. Яагаад гэвэл энэ хоёр нам Н.Энхбаяр, У.Хүрэлсүх гэсэн хоёр хүний хувийн өмч биш.

Хоёр нам нэгдэх тухай санал асуулгыг маш хурдан хугацаанд, улс орон даяар гишүүд дэмжигчдийнхээ хүрээнд богино хугацаанд шийдэх хэрэгтэй байна” гэсэн билээ.

Б.Баатар