Шилэн Цогоо нэрээр олонд танигдсан иргэн Б.Цогтгэрэл Уул уурхай, хүнд үйлдвэрийн сайдад сануулга өгч, хэрэв "TTJVCO” компанитай байгуулсан гэрээг сунгах, сунгахыг завдвал албан тушаалаас нь огцруулах улс төрийн тэмцэл өрнүүлнэ гэдгээ мэдэгдлээ.

"TTJVCO" ХХК нь "Эрдэнэс тавантолгой" ХК-ийн Цанхийн зүүн уурхайд олборлолт, хөрс хуулалтын ажил хийдэг БНХАУ-ын 100 хувийн хөрөнгө оруулалттай компани юм.

Тус компанитай холбоотой асуудал өмнө нь хөндөгдөж байсан ч тэгэсхийгээд намжсан байдаг. Харин иргэн Б.Цогтгэрэл Уул уурхай, хүнд үйлдвэрийн яамнаас Хятадын 100 хувийн хөрөнгө оруулалттай “TTJVCO” компанийг дахин тендерт оруулах гэж байгааг эсэргүүцэж байгаа аж.  

Тэрбээр энэ талаар "TTJVCO гэрээтэй холбогдуулан "Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль"-ийг УУХҮ сайд Г.Ёндонд хууль сануулж байна.

5.1.20.“Монгол Улсын гарал үүсэлтэй бараа” гэж Монгол Улсад олборлосон, ургуулсан, бойжуулсан, үйлдвэрлэсэн, боловсруулсан, эсхүл хийж бүтээсэн бараа буюу эд ангиудын дийлэнхийг угсарч, түүний үндсэн шинж чанар, зориулалт, ашиглалтын хэлбэрээс илт өөр болгосон шинэ барааг;

10 дугаар зүйл.Тендерт оролцогчдод давуу эрх олгох

10.1.2.а.Монгол Улсын иргэн, хуулийн этгээд;

10.1.2.б.Монгол Улсад бүртгэлтэй, өмчийнх нь 50-иас доошгүй хувь нь Монгол Улсын иргэн, хуулийн этгээдийн хувь хөрөнгөөс бүрдсэн гадаадын хөрөнгө оруулалттай хуулийн этгээд;

10.1.5.хуулийн этгээдийн ажиллах хүчний 90-ээс доошгүй хувь нь Монгол Улсын иргэн байх.

10(1) дүгээр зүйл.Дотоодын үйлдвэрээс бараа худалдан авах

10(1)1.Чанар, стандартын шаардлага хангасан барааг дотоодын үйлдвэрлэлээр хангах боломжтой тохиолдолд тендер шалгаруулалтад гадаадын бараа нийлүүлэгчийг оролцуулахыг хориглоно.

Монгол Улсын иргэд бид өөрсдөө чадахгүй бол гадаадаас авна гэдэг л хуультай. Монголчууд говийн элсэрхэг хөрсийг хуулж ядаад, ЭТТ хорвоо дэлхийд байхгүй өндөр үнээр TTJVCO-г ажиллуулаад байх шаардлага огт байхгүй.

Хуулиа л барьцгаая. Бид нар чадахгүй бол та нар хий. Гэхдээ бид одоо хөрсөө хуулж чадна.

Ийм учраас 100 хувь Хятад хөрөнгө оруулалттай TTJVCO баярлалаа TTJVCO баяртай TTJVCO

Хэрвээ энэ гэрээг сунгах, сунгахыг завдах аваас УУХҮ сайд Г.Ёндонг огцруулах улс төрийн тэмцэл өрнүүлэн удирдан манлайлж орох, албан тушаалын байдлаа ашиглан хууль зөрчсөн этгээдэд хариуцлага тооцуулан ажиллахаа үүгээр илэрхийлье" гэжээ. 

Б.Баатар