МАН, МАХН нэгдэх тухай бор шувуу газар аваад байсан ч энэ талаар намын удирдлагууд албан ёсоор мэдээлэл өгөөгүй байсан юм. Тэгвэл өнөөдөр буюу намынхаа 100 жилийн ойгоороо хоёр нам нэгдэнэ гэдгээ хамтдаа цэцэг өргөж, хүндэтгэл үзүүлснээр илэрхийлэх шиг боллоо.

МАХН-ын дарга Н.Энхбаяр "Хоёр намын нэгдэх асуудал нь У.Хүрэлсүх, Н.Энхбаяр нарын хүсэл сонирхолоор болохгүй. Намуудын гишүүд дэмжигчдийн саналаар шийдэх асуудал. Хэрэв тэд зөвшөөрч, хүсэл зорилгоо нэгтгэх хэрэгтэй гэж үзвэл нэгдэх болно" гэдгээ мэдэгдээд байсан юм. Ямартай ч олны дунд хөвөрөөд байсан намууд нэгдэх тухай шумыг ийнхүү өнөөдөр батлав бололтой.

Гэхдээ 2016 оны УИХ-ын сонгуулийн өмнө яг ийм үйл явц өрнөж байсан. Тодруулбал, МАН, МАХН Эх орончдын өдрийг гуравдугаар сарын 1-ний өдөр хамтран тэмдэглэж байлаа. Гэвч нэгдээгүй, сонгуульд ч эвсэж ороогүй.

Харин энэ удаа нэгдэн нийлж, 100 жилийн ойгоороо хүч хавсрахаар шийдсэн бололтой. 

Б.Баатар