Төрийн дээд удирдлага, албан тушаалтнууд “Хариуцлага тооцно” гэдэг үгээр халхавч хийн, харин ч өөрсдөө хариуцлагаас бултаж, булзах нь жишиг боллоо. Хариуцлагын тогтолцоог  дээд шатандаа хэрэгжүүлдэг баймаар атал өдгөө дунд, доод шатны хэн нэгэн албан тушаалтанг ажлаас нь чөлөөлснөөр асуудал дуусгавар болдог.  Энэ байдал Батлан хамгаалах яам, ЗХЖШ-т бүр ужгирсан гэж хэлж болно. Эх орноо хамгаална хэмээн инээд алдан цэрэгт мордсон хүү нь удалгүй зуурдаар  амиа алдлаа, амиа хорлосон, эрхтэн дутуу боллоо гэх мэдээ сонсох нь эцэг, эхэд нь тэнгэр ниргэхтэй адил. Энэ тухай хэвлэл мэдээллийнхэн сэрэмжлүүлэх үүднээс бишгүй л бичиж байв. Харамсалтай нь, асуудлыг шалгаж байна, ар гэрийн маргаан байсан, буруутай эзнийг олно, ер нь ч тэгээд ч байлдагчийн, цэргийн буруу хэмээн үхсэн хүн үг хэлдэггүй гэгчээр “бухаж” ирсэн нь нууц биш.

Харин хэдхэн хоногийн өмнө нэгэн бичлэг ил болж, Зэвсэгт хүчний жанжин штабынхан цэргүүдийн дунд дэглэлт, дарамт бийг бараг л анх удаа хүлээн зөвшөөрч, ар гэрийнхнээс нь уучлалт гуйлаа. Эл бичлэгийг олон хүн нүдээрээ үзэж, чихээрээ сонссон тулдаа л Батлан хамгаалах яам, ЗХЖШ-ынхан мэлзэж чадсангүй. Үгүй бол, аргалж, аргацаахдаа гаргуун тэд бас нэгэн башир арга олох л байсан.

Уучлал гуйх нэг хэрэг. Учрыг олох хамгийн чухал. Гэсэн ч Батлан хамгаалахын сайд, бригадын генерал  Г.Сайханбаяр чаддагаараа л цаг хугацааг ухраан “Тухайн үед бичлэг хийсэн цэргүүдийг шийтгэнэ” хэмээн ам алдав.  Олон аавын хүүгийн амь эрсдэж буйд харамслаа илэрхийлж, армидаа шинэчлэлт хийх тухай ярих атал аанай л бичлэг хийсэн, тараасан цэргүүдийг дуудан авчирч шийтгэх юм гэнэ.

Энэ талаар УИХ-ын дэд дарга Т.Аюурсайхан “Цэргийн алба хаагчдын дунд байгаа хүний эрхийн асуудал өөрөөр хэлбэл, сүүлийн үед алба хаахаар очсон алба хаагчид амь нас, эрүүл мэндээрээ хохирдог явдал ноцтой болсон.  Бид хэдэн онд ажиллаад,  цэргүүд хэдэн онд үүрэг гүйцэтгээд байгаа юм. Өвлийн цагт олон цагаар хөл нүцгэн гүйлгэж дэглэснээр хөлөө тайруулж байна. Зодуулж, дарамтлуулж амь насаа алдаж байна.  Энэ ноцтой байдлыг маш богино хугацаанд өөрчилж, таслан зогсоох ёстой. Яаралтай таслан зогсоохын тулд өмнө болсон хэргүүдийг бүгдийг шалгаж тогтоон, гэм буруутай этгээдүүдэд хариуцлага тооц. Үгүй бол Батлан хамгаалахын сайд, ЗХЖШ-ын дарга ёс зүйн хариуцлагаа үүрч, огцор” хэмээлээ.

Өөрсдийнх нь булхайг илчилж, бодит байдлыг дэлгэсэн цэргүүдийг дуудаж авчран хариуцлага тооцож, шийтгэл ногдуулах тухай ярьж суугаа Батлан хамгаалахын сайд ичээсэй билээ. Шийтгэнэ гэж ярьж суухын оронд дахин ийм явдал гаргуулахгүйн тулд шат шатандаа хариуцлагын асуудлыг ярих ёстой. Эс бөгөөс Батлан хамгаалахын сайд Г.Сайханбаяр, Зэвсэгт хүчний жанжин штабын дарга Д.Ганзориг нар  хариуцлагаа үүрч, огцрох ёстой. Үгүй бол, олон зуун эцэг, эхийн нулимс, харуусал дундуур хаа хүртэл туучих гээд гүрийгээд байдаг юм бол оо.

У.Тэргэл