Өнөөдөр Эх орончдын өдөр буюу МАН-ын 100 жилийн ой тохиож байна. Эл өдөр МАН, МАХН-ын удирдлагууд жанжин Д.Сүхбаатартын хөшөөнд цэцэг өргөж, Эзэн Чингис хааны хөшөөнд хүндэтгэл үзүүлж баяраа хамт тэмдэглэж буй.

МАХН-ын Ерөнхий нарийн бичгийн дарга Б.Тулга 100 жилийн ойн хүрээнд тавьсан илтгэлдээ "Орсон бороо арилдагийн адил гарсан зөрчил намжиж, бид ирээдүйгээ, ирэх 100 жилийн түүхээ салсан биш нийлснээр, муудсан биш сайдснаар, эвдэрсэн биш эвлэрснээр бичих нь өнөө үед эдгээр намуудыг удирдан манлайлж буй бүх хүний түүхэн үүрэг байх болно" гэдгийг  дурджээ.

Тэрбээр "Эрдэнэт УБҮ-ийн 49%-ийн хувьцааг төрийн мөнгөөр хувьдаа завшсан гэмт үйлдлийг таслан зогсоож, Салхитын мөнгөний ордыг монголын ард түмний мэдэлд авч байгаа зэрэг олон эх оронч үйлдэл нь МАХН ба МАН хэмээн салсан гол зөрчлийг арилгах улс төрийн нөхцлийг бүрэлдүүлж байна.

Нэгэнт түүхийнхээ нэгээхэн хэсэгт бий болсон улс төрийн шийдэл, гаргалгаанаас шалтгаалан зөрөлдсөн намуудын үзэл бодол, харилцаа хандлага нь 100 жилийнхээ түүхт ойн босгон дээр эргэн ойртож буй нь аль аль намын гишүүд дэмжигчдийн дундаас тухайлбал МАХН-ын гишүүд, Зуут, Мянгат, Түмтийн дарга нарын санал, санаачилга, шахалт шаардлагаар тус намын удирдах бүрэлдэхүүнд ирсээр байгаагаас тод илрэн харагдаж байна.

Дэлхий ертөнцийн хөгжлийн цоо шинэ замд хөтлөх оюуны хараа, олны хүч МАХН-д бий. Энэ зүтгэл Монголоо гэсэн хүн бүрт байх ёстой. Орсон бороо арилдагийн адил гарсан зөрчил намжиж, бид ирээдүйгээ, ирэх 100 жилийн түүхээ салсан биш нийлснээр, муудсан биш сайдснаар, эвдэрсэн биш эвлэрснээр бичих нь өнөө үед эдгээр намуудыг удирдан манлайлж буй бүх хүний түүхэн үүрэг байх болно" хэмээсэн байна. 

Б.Баатар