Сүржин нэр, даржин үйл ажиллагаагаар эхэлсэн “Эрсдэлийн мэдээллийн хороо”-ны сураг алдарч, бүрэлдэхүүн нь өөрчлөгджээ. Монгол Улсын Засгийн газраас коронавирусний цар тахалтай холбоотойгоор “Эрсдэлийн мэдээллийн хороо”-г байгуулсан. Уг хороог "Коронавируст халдварын цар тахлын нөхцөл байдал, цар тахлын үеийн нийгэм, эдийн засагт үзүүлэх сөрөг нөлөөллийг бууруулах, урьдчилан сэргийлэх чиглэлээр Засгийн газар, Улсын онцгой комиссоос авч хэрэгжүүлж байгаа арга хэмжээ, үйл ажиллагааны талаар үнэн зөв, бодит мэдээ, мэдээллийг олон нийтэд хүргэх, ухуулан таниулах үүрэгтэйгээр анх байгуулсан байдаг.

Тухайн үед тус хороог Соёлын сайд Ч.Номин даргалж, нарийн бичгийн даргын үүргийг Харилцаа холбоо, мэдээллийн технологийн газрын дарга Б.Болор-Эрдэнэ нарт хариуцуулсан.  

Харин тэдний ажлын чиг үүрэг нь эхнээсээ хазайж, хэрэгжүүлж буй ажил нь иргэд болоод сэтгүүлчдийн шүүмжлэлтэй тулгарсан юм. 

Нэг зуун наян сая төгрөгийн үйл ажиллагааны зардалтай түр хорооны сураг өдгөө алдарч, шүүмжлэлд "идүүлсэн" Соёлын сайд Ч.Номин ч уг албанаас сугарч дөнгөжээ. Тодотговол, Засгийн газрын 2021 оны 39 дүгээр тогтоолоор “Эрсдэлийн мэдээллийн хороо”-ны бүрэлдэхүүнийг өөрчлөн баталжээ. Ингэхдээ, Түр хороог Засгийн газрын Хэрэг эрхлэх газрын Хэвлэл мэдээлэлтэй харилцах газрын дарга Ц.Ганзоригт хариуцуулахаар болж, Нарийн бичгийн даргаар Онцгой байдлын ерөнхий газрын Гамшгаас урьдчилан сэргийлэх газрын дарга Б.Ууганбаярыг томилжээ.

Харин тус хорооны бүрэлдэхүүнд Харилцаа холбоо, мэдээллийн технологийн газрын дарга, Гадаад харилцааны яамны Консулын газрын захирал, Зам, тээврийн хөгжлийн яамны Төрийн захиргааны удирдлагын газрын дарга, Эрчим хүчний яамны Төрийн захиргааны удирдлагын газрын дарга, Эрүүл мэндийн яамны Төрийн захиргааны удирдлагын газрын дарга, Мэргэжлийн хяналтын ерөнхий газрын дэд дарга, Цагдаагийн ерөнхий газрын дэд дарга, Нийслэлийн Засаг даргын Тамгын газрын Төрийн захиргааны удирдлагын хэлтсийн дарга, Монголын Үндэсний олон нийтийн радио, телевизийн Үндэсний зөвлөлийн дарга (зөвшилцсөнөөр)-ыг багтаасан байна. 

“Эрсдэлийн мэдээллийн хороо”-г байгуулсныхаа дараахан буюу хоёрдугаар сарын дундуур Эрүүл мэндийн яамны 11 цагийн мэдээллийг Төрийн ордноос хүргэснээс өөр олон нийтэд мэдэгдэж, хүрсэн ажил төдийлөн байхгүй гэж хэлэхэд ч нэг их хилсдэхгүй биз. Ийм л байсаар үйл ажиллагаа, тус хорооны чимээ ч өнөөдөр дуулдахаа болив. 

Төрийн албаны данхар бүтцийг цөөлнө гэдэг ч начир дээрээ энэ мэт хэдэн зуун сая төгрөгийн зардалтай хороо гээчийг байгуулсаар байна. Угтаа дээрх хорооны бүрэлдэхүүнд багтсан эрхмүүд нь бүгд чиг үүргийнхээ хувьд цар тахалтай тэмцэх учиртай улс. Гэтэл ийнхүү хэдхэн "өдрийн настай" хороо гээчийг байгуулж, хэн "эрх шар"-уудын албан тушаал хольж, сольж байдаг хороог юуны учир байгуулав. 

Б.Баатар