Монгол улсад телевизийн урлаг үүсч хөгжсөний 45-н жилийн ойг тохиолдуулан МҮОНТ-ээс телевизийн салбарт ажиллаж байгаа уран бүтээлчид, инженер техникийн ажилтнуудын дунд “Спортын наадам”-ыг зохион байгуулах гэж байна. Телевизийн салбарт ажиллаж байгаа уран бүтээлчдийн чөлөөт цагийг зөв боловсон өнгөрүүлэх, тэдний хоорондын харилцааг бэхжүүлэх, залуу уран бүтээлчдийг танилцуулж нөхөрлүүлэх зорилготойгоор  сагсан бөмбөг, гар бөмбөг, хөл бөмбөг, боулинг, ширээний теннис, шатар гэсэн спортын  зургаан төрлөөр уралдаан тэмцээн зохион байгуулна. Шатрын тэмцээн 09 дүгээр сарын 14-ний өдөр Монгол туургатны “Урамтай шатар” клубт амжилттай болж дүнгээ гаргасан. Хөл бөмбөгийн тэмцээн 2012 оны 9 дүгээр сарын 19-нд 3-р сургуулийн хөл бөмбөгийн талбайд, Гар бөмбөгийн тэмцээн 9 дүгээр сарын 20, 21-ний өдрүүдэд Мон-Алтиус БТДС-ийн спорт зааланд болох бол, Боулингийн тэмцээн “Big bowling” клубт  9 дүгээр сар 21-нд,  ширээний теннис 09 сарын 20-ний өдөр “Оч” клубт, Сагсан бөмбөгийн тэмцээн “Аврагч” спорт хорооны зааланд 09 сарын 22,23-ны өдрүүдэд тус тус зохиогдоно. Спортын наадмын нээлтийн ажиллагаа 2012 оны 9 дүгээр сарын 20-нд “Мон-Алтиус” БТДС-ийн спорт зааланд  болно. Нийт телевизийн мэргэжил нэгт уран бүтээлчид, инженер техникийн ажилтнууд та бүхнийг хурд хүч, авхаалж самбаагаа сорин идэвхитэй оролцохыг уриалж байна.