Улсын Онцгой Комисс  цагийн өмнө хуралдсан. Уг хуралдаан өмнөхийн адил бүхий л үйл явдал болж өнгөрсний хойно болж, засч залруулахад хожимдсон шийдвэрүүдээ ёс мэт гаргадгаараа гаргалаа. Тухайлбал, маргаашнаас буюу  3 дугаар сарын 10-наас худалдаа үйлчилгээний байгууллагынныг Ковид-19-ийн эсрэг вакцинд хамруулах. Улс даяараа өргөн тэмдэглэдэг, үндэсний баяр болох Цагаан сарыг хөл хорионд өнгөрүүлсэн иргэд хөл хорионы дэглэмийг сулармагц золголтоо эхлүүлсэн гэхэд хилсдэхгүй.

Үзвэр үйлчилгээний газрууд нээгдэж УДЭТ-аас л гэхэд 54 халдварын тохиолдол илэрч, 3-наас 6-ны өдөр жүжиг үзсэн 900 гаруй хүн, тэдний ойрын болон хоёр дахь хавьтлууд гэхчилэн ирэх өдрүүдэд халдвар авсан иргэдийн тоо нэлээдгүй нэмэгдэх магадлалтай.

Харамсалтай нь УОК хөл хориогоо сулруулахдаа, вакцин хийх хүмүүсээ зэрэглэн тогтоохдоо ч ёс мэт хожимдсон шийдвэр гаргалаа. Гуравдугаар сар гармагц эхний баасан гарагаас л албан газрууд Мартын 8-наа тэмдэглэж эхэлсэн. Халдварын тохиолдлууд нэмэгдэх магадлал бүр өндөрсөнө. Харин УОК үүнийг огт тооцоолоогүй бололтой.

Ерөнхий сайд Л.Оюун-Эрдэнэ АстраЗенека вакцины эхний тунг тариулж, хатуу хөл хорионы дэглэмийг бууруулснаас хойш ердөө 14 л хонож байна. Энэ хугацаанд халдварын тохиолдол хурдтай нэмэгдэж, өдөртөө 100 гарч, батлагдсан тохиолдол 3336 болжээ.

Хэрэвзээ хөл хорионы дэглэмээ сулруулсан өдрөөсөө үзвэр үйлчилгээний байгууллагын ажилтнуудаа эхний ээлжийн хүмүүст оруулан вакцинжуулж эхлэх ёстой байжээ. Халдвараа хумьж чадсан 14 хоног хайран.

ЭМЯ-ны мэдээллээр өнгөрсөн сарын 23-наас хойш өнөөдрийг хүртэл нийт 9531 хүнд вакцин хийсэн нь чамлахаар тоо. Вакцинжуулалт энэ хурдаараа, ийм эрэмбээр явбал нийт хүн амын 60 хувийг хамруулахад ахиад 3-4 жил шаардагдана. Тэр хооронд ахиад хөл хорио тогтоовол эдийн засаг тэр чигтээ сүйрлийн ирмэгтээ очно. Халдвар авсан хүмүүсээ эмчлэх газар, тусгаарлах байрны талаар ярих ч хэрэггүй болох биз.

Өчигдрийн УОК-ын хурлын дараа Эрүүл мэндийн сайд С.Энхболд “Маргааш 15 мянган иргэнийг вакцинжуулна” гэж мэдэгдсэн. Энэ маргааш нь 2 дугаар сарын 24 байсан бол халдвар авсан хүмүүсийн тоо бага байх байж дээ.

Иргэд, ААН-үүдийн эдийн засаг, санхүүгийн байдлыг дэмжих үүднээс хэмээсэн тайлбартайгаар хатуу хөл хорионы дэглэмийг сулруулсан ч үнэндээ хөл хориогоор бүхнийг шийдэхгүй гэдгээ УОК-ийнхон ойлгосон биз. Онцгой нөхцөлд цөөхөн монголчуудынхаа амь нас, эд хөрөнгийг аврах чухал ажлыг зохион байгуулах ёстой Улсын Онцгой Комиссийн ямар ч бэлтгэлгүй, менежмент муутай, иргэдээ бүү хэл дотоод үйл ажиллагаагаа ч зохион байгуулах чадваргүй, сэтгэлгүй, зүтгэлгүй хүмүүсээс бүрдсэн байдгийг иргэн бүр, яс махандаа шингэтэл ойлгож авсан.

Өвчин, цар тахал авилга авдаггүй, даргаас айдаггүй, намчирхдаггүй учир, өөрсдийнх нь ашиг хонжоо харсан хөгийн дүрмээр байдаггүй учраас өнөөдөр УОК үнэнд гүйцэгдэж, үнэн төрх нь тодорч байна даа.

Л.Амарсанаа