ҮАБЗ-ийн Нарийн бичгийн дарга А.Гансүх цаг үеийн асуудлаар олон нийтэд тайлбар өглөө.

Тэрбээр “Монгол Улсын Ерөнхийлөгч, ҮАБЗ-ийн тэргүүний өгсөн үүрэг, даалгаврын дагуу та бүрэнд тайлбар хийхэр ирээд байна. Өнөөдөр зарим хэвлэл мэдээллүүдээр ҮАБЗ-ийн алба хаагчид 2 сая ам.доллар оруулж ирсэн мэтээр гүтгэлгийн чанартай мэдээлэл тараалаа.

Энэ бол гүтгэлэг.

ҮАБЗ бол төрийн тусгай чиг үрэгтэй байгууллага. Төрийн болон цэргийн тангараг өргөдөг тусгай алба хаагчид. Үйл ажиллагаа нь далд хэлбэрээр явагддаг. Тухайн үед албаны тусгай үүрэг биелүүлэхээр ОХУ-ын Улаан-Үд хот хүртэл машинтай яваад буцаж ирсэн. Энэ машинд ямар нэгэн хууль бус зүйл байгаагүй. Ирээд хуулийн дагуу тусгаарлалтад орсон. Нууцын зэрэглэлтэй учраас тодорхой мэдээлэл өгөх боломжгүй. 

Улстөржөөгүй үлдсэн ганц байгууллага бол ҮАБЗ-ийн ажлын алба. Энэ байгууллагыг битгий улстөржүүлээч гэх эрх мэдэлтнүүдэд хэлье. Түүнчлэн ҮАБЗ шүүгч нарын томилгоонд оролцдоггүй гэдгийг хэлье.

Өмгөөлөгч Б.Баасанцогттой танил. Намайг Зам тээвэр, хөгжлийн сайд байхад МИАТ-д ажилладаг байсан. Т.Чимгээ нарыг эрүүдэн шүүхтэй холбоотой үйл ажиллагаа явж байхад би энгийн иргэн байсан. Тиймээс Л.Оюун-Эрдээ Ерөнхий сайдын хэлсэн шиг энэ суудлыг нөлөөлөх боломжгүй" гэлээ. 

Б.Лхам