Жил шахам хугацаанд удирдагчгүй явсан АН энэ сард даргаа сонгох тов гарсан. Энэ хүрээнд намын даргад нэр дэвшигчдийг өнгөрөгч долоо хоногт бүртгэсэн билээ.

Анх 16 хүн намын даргад өрсөлдөхөөр нэр дэвшиж байсан бол өдгөө дэнчингийн мөнгөө төлж, албан ёсоор өрсөлдөх эрхээ авсан долоон хүн үлдсэн гэх мэдээлэл байна.

Тодруулбал, нийслэлийн АН-ын дарга асан Д.Пүрэвдаваа, УИХ-ын гишүүн О.Цогтгэрэл, Ж.Батсуурь, гишүүн асан Ц.Оюунгэрэл, М.Тулгат, МҮХАҮТ-ын ерөнхийлөгч О.Амартүвшин, С.Эрдэнэболд нар үлджээ.

АН-ын даргын сонгуулийн зардал 1.1 тэрбум бөгөөд 16 нэр дэвшигчээс 74.7 сая төгрөгийг татах тооцоо гарч байсан ч дөрөв нь нэрээ татаж 93.4 сая төгрөгийг намын Дотоод сонгуулийн хорооны дансанд байрлуулахаар болсон байдаг. Тэгвэл энэ мөнгө дахин нэмэгдэж, 150 орчим сая төгрөг болох асуудал яригдаад эхэллээ. Өөрөөр хэлбэл, намын даргын сонгуулийн зардал болох 1.1 тэрбумыг үлдэгдлийг өрсөлдөх эрхээ авсан дээрх долоон хүнээс нэмж авч магадгүй байна.

Б.Лхам