Ажилгүй залуусыг сарын тэтгэлэгтэй сургалтад хамруулж, ажлын байранд зуучлах талаар ХНХ-ын сайд А.Ариунзаяа мэдээлэл өглөө.

Тэрбээр “18-34 насны залуусыг нэг сая төгрөгийн тэтгэлэгтэй сургаж, ажлын байранд зуучлах, тэдэнд хандлагын өөрчлөлтийг бий болгох агуулгаар сургалтыг бэлдсэн. Энэ жил нийт 5000 гаруй залуусыг сургана.

Эхний ээлжинд туршилтын зорилгоор нийслэлийн 500 залууг сургаж, хөтөлбөрөө туршиж үзнэ.

Их, дээд сургууль төгссөн дипломтой ажилгүй залуус их байна. Үсрэнгүй хөгжсөн улс орнуудад 10 хүүхэд тутмын 2-3 нь их, дээд сургуульд сурч төгсөж байгаа бол манайд эсрэгээрээ байна. Тиймээс боловсролын тогтолцоог цогцоор нь шийдэх шаардлага байна.

Хөдөлмөрийн зах зээлийн тухайд манай улсад 15 ба түүнээс дээш насны 2.1 сая хүн бий. Тэдний 994 мянга эрэгтэй, 1.1 сая нь эмэгтэй байна. Ажилгүй иргэдийн 58 хувь нь хүнсний эрхийн бичиг авч байна.

Эмзэг бүлгийн, мэдээллээс хол иргэдийг түлхүү хамруулж, залуусыг хооронд нь өрсөлдүүлнэ. Өнөөдрийн байдлаар 20-30 мянган ажын байр байна. Өөрөр хэлбэл, ийм хэмжээний ажлын байр эзнээ хүлээж байна гэсэн үг

Уг хөтөлбөрийг залуус өрсөлдөж ордог хөтөлбөр байгаасай гэдэг агуулгаар боловсруулсан. Сонгон шалгаруулалтыг эсээ бичих, ярилцлагад орох зэргээр хийж магадгүй” гэлээ.

Б.Лхам