ҮАБЗ-ийн нарийн бичгийн дарга А.Гансүхтэй холбоотой дуулиан сүүлийн өдрүүдэд өрнөж байна. Тэрбээр энэ талаараа хэвлэлээр дамжуулж тайлбар өгсөн ч хөдөлшгүй баримтууд ар араасаа гарч ирсээр байгаа юм. Харин А.Гансүх өнөөдөр өөрийн нүүр хуудсаараа дамжуулан төрийн өндөрлөгүүдэд хандлаа. Тодруулбал, 75 настай түүний аав Хурдын байрныхаа өмнөх замаар гарч яваад автомашинд мөргүүлэн, хүндээр гэмтсэн байна. Үүнийг тэрбээр улс төрийн зорилготой хэмээн тодотгож, ийн мэдэгдэл хийжээ.

У.Хүрэлсүх, Л.Оюун-Эрдэнэ, Х.Нямбаатар нарт

Өнөөдрийг хүртэл болж буй үйл явдлыг улс төр, гэхдээ их бохир улс төр гэж бодож явлаа. Хувь хүн рүү дайрсан гүтгэлэг, доромжлолыг тэвчиж ирлээ. ҮАБ-ыг хамгаалдаг хамт олныг гүтгээд эхлэхээр нь нийгэмд хагарал, талцал үүсэхээс сэргийлж, 2021 оны гуравдугаар сарын 9-нд “Өдрийн сонин”-д ярилцлага өгсөн. Уншсан биз. Гэтэл тэр өдрийн орой  17.50 цагт өндөр настай аавыг минь гэрийн гадаах явган хүний гарц гарч явахад нь машинаар дайрлаа.Өндөр настай аав минь хүнд гэмтэл авч, одоо ГССҮТ-д эрчимт эмчилгээ хийлгэж байна. Үүнийг би тохиолдол гэж бодохгүй байна.

Миний гэр бүл, ойр дотнын хүмүүс рүү халдлага хийж байна. Дараа нь юу болох вэ.

Та нарт хэлэх үг байна. Эр хүний зориг гаргаад зөвхөн надтай л тулчих. Миний настай аав, ээж, дүү, эхнэр хүүхдүүд, найз нөхөд, хамт олныг орхичих. Тэд маань Монгол Улсын жирийн иргэд. Монгол төр иргэдээ хэлмэгдүүлэхгүй гэж найдаж байна.  Хууль хүчний байгууллагад итгэхгүй байгаа учир нийгэм рүү хандлаа. Шуурхай арга хэмжээ авч, амийг нь аварсан ГССҮТ-ийн хамт олонд маш их баярлалаа. Эмч нартаа найдаж байна” гэжээ.

У.Тэргэл