Монгол Улсын Ерөнхийлөгч Халтмаагийн Баттулга Монгол Улсаас АНУ-д суугаа Онц бөгөөд Бүрэн эрхт Элчин сайд Ё.Отгонбаярыг эгүүлэн татах асуудлыг зөвшилцөхөөр УИХ-ын дарга Г.Занданшатарт албан бичиг хүргүүлсэн билээ. Тэрбээр Элчин сайд Ё.Отгонбаярыг хоёр орны худалдааны эргэлт, хөрөнгө оруулалт, эдийн засгийн хамтын ажиллагаанд дорвитой ахиц гарсангүй, санаачилга гаргаж ажилласангүй. Монгол Улсын байгалийн баялгийн орлогыг нэр бүхий улстөрчид гадаадад, оффшор дансанд байрлуулсан байж болзошгүй асуудлаар АНУ-ын Нью-Йорк мужид явж буй шүүхийн маргааны талаар хуулийн байгууллагын шийдвэр гараагүй байхад олон нийтийн сүлжээгээр дамжуулан илт улстөржсөн байр суурь илэрхийлсэн нь Дипломат албаны тухай хуулиар хүлээсэн үүрэг болон төрийн албан хаагчийн ёс зүйд нийцэхгүй. Тиймээс эргүүлэн татах шаардлагатай хэмээн буруутгасан билээ.

Өмнө нь манай улс Монгол Улсаас Их Британи, Умард Ирландын Нэгдсэн Вант улсад суугаа Элчин сайд С.Баяр, Шведийн Вант улсад суугаа Элчин сайд М.Энхсайхан нарыг 2018 оны тавдугаар сарын 17-ны өдрийн УИХ-ын нэгдсэн чуулганы хуралдаанаар хэлэлцэж, тэднийг эргүүлэн татсан билээ. Хариуцлага ногдуулна хэмээж байсан нь эцэстээ авлига, албан тушаалын хэрэгт буруутган ялласан.

Харин энэ удаад Ё.Отгонбаяр Ерөнхийлөгчийн ундууцлыг төрүүлжээ. Хамгийн гол нь түүнийг нэр бүхий улстөрчдын оффшор данстай холбоотой мэдээллийг өөрийн шугмаар хөөцөлдөн ил гаргаж, тодорхой алхам хийх байтал хойш суусан. Өөрийнх эхлүүлсэн тэмцлийг үл тоосон хэмээн шазуур зууж байгаа талаар улстөрчид хэдийнэ “шаагилдаад” эхэлжээ.

Монгол Улсын Ерөнхийлөгчийн хувьд 20 орчим орны Элчин сайдыг өнөөдрийг хүртэл томилохгүйгээр гацааж буй. Энэ нь Монгол Улс тухайн орныг үл хүндэтгэн, үл тоомсорлож буйн илрэл болно гэдгийг ахмад дипломатчид сануулсаар байгаа. Гадаад харилцааны сайд Б.Батцэцэг ирэх хаврын чуулганаар эл асуудлыг оруулж, элчин сайд нарыг яаралтай томилох асуудлыг шуурхайлна гэж буй нь санасны зоргоор болох эсэх нь эргэлзээтэй юм.

У.Тэргэл