Хэрэв өөрсдийнх нь өгч байгаа мэдээлэл үнэн бөгөөд үйл явдал нь хүчин төгөлдөр бол АН-ын даргын төлөөх сунгаа өчигдөр албан ёсоор эхэллээ. АН-ын Үндэсний бодлогын хорооны хуралдаан танхимын болон цахим хэлбэрээр болж намын даргад нэр дэвшигч дөрвөн хүнээ тодруулсан тухайгаа хэвлэлийнхэнд мэдээлэв. Уг нь намын даргын сунгаанд нэр дэвшигчийн хүсэлтийг хүлээн авах хугацаанд 18 хүн сунгаанд оролцохоор бүртгүүлээд байлаа. Харин өчигдрийн хурлаас дөрвөн хүн л намын даргын сунгаанд нэр дэвших эрхийг авчээ. Намын даргын сонгуулийн сурталчилгаа өнөөдөр албан ёсоор эхэлж, нийт 12 хоног үргэлжилнэ. Гуравдугаар сарын 26-ны өдөр сурталчилгаа дуусч 28-нд Ардчилсан намын нийт гишүүд даргаа сонгох санал хураалтаа явуулна.

Үйл явдлыг нэхэн санахад даргын сунгаанд оролцох 18 хүний хүсэлтийг АН-ын Дотоод сонгуулийн хороо хүлээн авч хэлэлцээд 16 нэр дэвшигчийг шаардлага хангажээ гэж үзсэн. Нэгэн үе АН-ын туг нь болж дөрвөн ч сонгуульд ялалт байгуулж байсан АН-ын дарга асан Н.Алтанхуягт тэд намын даргын сунгаанд оролцох эрх олгоогүй.

Бас өнгөрсөн сонгуулиар Баянгол дүүрэгт бие даан нэр дэвшин АН-ын дарга С.Эрдэнэтэй өрсөлдөн, түүнээс олон мянган санал илүү авч байсан П.Галиндэвийг сунгаанд өрсөлдүүлэхгүй гэдгээ АН-ын Дотоод сонгуулийн хороо зарласан. Энэ хугацаанд дахин хоёр нэр дэвшигч өрсөлдөхгүй гэдгээ зарлан нэрээ татсан учраас үлдсэн 14 горилогчид хүн тус бүрт 93 сая төгрөгийн босго тавин өрсөлдөх эрхийг нь нээлттэй үлдээсэн байв. Энэ босгийг тогтоохдоо намын даргын сонгуульд 1.1 их наяд төгрөг хэрэгтэй хэмээгээд нэр дэвшигчдэд энэ мөнгийг босгох “даалгавар” өгсөн байсан юм. Бүх гишүүдээс сонгогдох намын даргад хэн өрсөлдөх эсэхийг шийдсэн АН-ын Дотоод сонгуулийн хорооныхон гэж тэгвэл хэн байв?

АН-ын жирийн гишүүд бол намаа нэгдээсэй, шинэчлэгдээсэй, ирэх сонгуулиудад намаа ялалтад хөтлөх даргатай болоосой гэж чин сэтгэлээс хүсч байгаа нь мэдээж. Гэтэл хэн намын даргын сунгаанд оролцох эсэхийг шийдсэн Дотоод сонгуулийн хорооныхон хуучин дарга нарынхаа заасан чигээр ажиллаж байгаа ажээ.

Үнэндээ одоогийн намын даргын сунгаа нь Ц.Туваан даргатай хэсгийнхэн зохион байгуулж байгаа мэт боловч эхний шалгаруулалтыг явуулсан Дотоод сонгуулийн хорооныхон нь дарга асан С.Эрдэнэ хийгээд З.Энхболдын хүмүүс байгаа юм. Нэг ёсондоо нийтэд Ц.Туваан АН-ыг төлөөлөх эрхтэй харагдаж байгаа боловч С.Эрдэнэ, З.Энхболд нараас салж чадаагүй нь үүгээр харагдаж байна. С.Эрдэнэ, З.Энхболд нараас салах хүсэл нь байвч хүслээ хурд нь гүйцэхгүй байна.

Тэгэхээр Ц.Туваантай АН даргын сунгаа зарласан боловч үнэндээ уг сунгааны эхний шалгаруулалтыг С.Эрдэнэ, З.Энхболд нар хийчихсэн байна гэхэд нэг их буруудхааргүй байна.

С.Сүлд