Байнгын хорооны өнөөдрийн хуралдаанаар Элчин сайд Ё.Отгонбаярын асуудлыг хэлэлцсэн.

Энэ үеэр УИХ-ын гишүүн Н.Алтанхуяг "Элчин сайд Ё.Отгонбаяр юу гэж жиргэсэн юм, тэрийг нэг хэлээд өгөөч. Хоёрдахь нь улсаа төлөөлөөд сууж байгаа хүн улсынхаа ажлыг хийх ёстой. Тэр сургууль руу хүний хүүхэд хөөцөлдөөд явж болох байх л даа. Хувийн байдлаар харилцаж байгаа юм уу, албаны байдлаар харилцаж байгаа юм уу гэдэг хоёр асуулт байна.

Гадаадад сууж байгаа Элчин сайдууд амралтын газар очсон юм шиг л байх юм. Би Ерөнхий сайд байхдаа цахим хурал хийж байсан. Тэр үед "Та нар наанаа юу гэж очсоноо ер нь мэдэж байгаа юу. Тэр оронтой хийж байгаа худалдаа, хамтын ажиллагааг  хөгжүүлэх гэж очсон юм шүү. Та нар ажлаа сайн хий" гэж хэлж байсан. Манайхан хивс юм уу, ноолууран бүтээгдэхүүн барьж яваад өөрсдөө манаргах юм. Та нар улсаас мөнгө төгрөг авч ажилладаг.  Наад хэлсэн зүйлүүд чинь үнэн бол Элчин сайдаас Ё.Отгонбаярыг шууд татах хэрэгтэй. Одоо энэ асуудал Нью-Йоркийн шүүхтэй холбоотой л юм болох гэж байна. 

Улс орны эрх ашиг нэгдүгээрт байх ёстой атал  дандаа амин хувиа хичээсэн, арчаагүй, хувийн ажил хийх юм. Тэд хүмүүсийн хувийн төлөөлөгчөөр ажилладаг. Дарга нар очихоор далдаганаж гүйдэг ийм л амьтад Элчин сайд нэртэй суугаа байхгүй юу. Тиймээс Ө.Шижир дарга та миний хоёр асуултад хариулаадах" гэв.  

Ерөнхийлөгчийн Тамгын газрын дарга Ө.Шижир "Гурван жилийн хугацаанд Ё.Отгонбаяр сайд гуравдагч орны Худалдааны тухай хууль буюу цаад утгаараа монгол малын ноос, ноолууран бүтээгдэхүүнийг АНУ-д экспортлох хууль дээр гурван конгресс дарааллаж, хангалттай сайн ажилласангүй гэсэн үндэслэл байгаа. Би сая Ерөнхийлөгчийн үндэслэлд  маш тодорхой дурдсан. Нэг ч удаа уулзалт хийх байтугай хүсэлт ч тавиагүй байна гэдэг өөрөө асуудал. 

Хоёрдахь асуултад хариулахад,  Элчин сайд Ё.Отгонбаяр Колумбиагийн их сургууль руу хувиараа имейлээр хандсан байгаа юм. Магадгүй Н.Алтанхуяг гишүүний хэлж байгаа үнэн. Монголын олон залуучууд АНУ-д магадгүй гуравдагч хөрш оронд  суралцах боломжийг нээж өгөх ёстой байх гэж үздэг. Энэ нь ч улс орныг төлөөлж байгаа Элчин сайдын хувьд нэн тэргүүний чухал үүрэг байх гэж боддог.

Харамсалтай нь, үүнд Батболд овогтой Сэдбазар гэдэг хүний хүүхдийн төлөө тухайн сургуулийн удирдлагатай хоёр, гурван ч удаа уулзалт хийгээд албан захидлаар энэ хүүхдийг сургуульд элсүүлэхийг хичээнгүйлэн хүссэн байсан. Ингэхдээ хувь хүний хувиар бус Элчин сайдын хувиар хандсан байна билээ.  

Сошиал орчинд байгаа мэдээ мэдээлэлд  бол Нью-Йоркийн шүүхэд  болсон ил дэлгэсэн баримт бичиг материалтай хүн өөрөөс нь асуусан юм шиг байгаа юм. Тэгэхэд нь "Би энэ талаар мэдэхгүй, илт худал мэдээлэл өгсөн байна" гээд хэт нэг талыг барьсан мэдээлэл өгсөн байна гэж үзсэн. 

УИХ-ын гишүүн Н.Алтанхуяг "Энэ одоо хийх ажилгүй юм уу. Элчин сайд хүн  твиттерээр жиргээд сууж байдаг. Жиргэдэг сэдэв, жиргэдэггүй сэдэв гэж байх ёстой. Улс орны холбоотой янз бүрийн эцэслээгүй маргаантай асуудлаар Элчин сайд хүн ийм зүйл жиргэж болохгүй л дээ. 

Ё.Отгонбаярын жиргээ над дээр ороод ирлээ. Энэ жиргээнд "Бид мэдээгүй ээ. Шуугиад эхлэхээр нь шалгаж үзсэн чинь хэргээ татчихсан байсан. Нөгөө С.Ганбаатар гишүүний өлсгөлөн зарласан асуудал юм байна шүү дээ. Илт худлаа мэдээлэл өгсөн байна билээ. Энэ одоо шүүгч үү. Шүүхэд яваа процессын талаар Ё.Отгонбаяр гэдэг хүн шүүхийн шүүгч болчихоод байгаа юм уу. Юу болчихоод байгаа юм" гэлээ. 

Б.Баатар