УИХ-ын хаврын ээлжит чуулган өнөөдөр 10.00 цагт нээлтээ хийнэ. Тогтсон хугацаанаасаа 20 орчим хоногийн өмнө нээлтээ хийж буй нь цаг үеийн олон асуудлыг шийдвэрлэх болсонтой холбоотой.

Дотоодод коронавирусний халдварын тохиолдол өдрөөс өдөрт эрс нэмэгдэж, нөхцөл байдал хүндэрч буй энэ үед эрхэм түшээд гараа хумхиад суух нь зохисгүй.

Энэ жилийн хаврын чуулган ихээхэн онцлогтой. Цар тахал, вакцинжуулалт, Монгол Улсын Ерөнхийлөгчийн сонгууль болон УИХ-ын нөхөн сонгууль угтсан улс төр өрнөхөөс гадна төсвийн тодотгол, Валютын зохицуулалтын тухай хуульд нэмэлт өөрчлөлт оруулах тухай хуулийн төсөл, Улс төрийн намын тухай хуулийн шинэчилсэн найруулгын төсөл, Улс төрийн намуудын санхүүжилтийн тухай хуулийн төсөл гээд улс төр, эдийн засагтай холбоотой чухал хуулийн төслүүдийг хэлэлцэж эцэслэх учиртай. Үндсэн хуулийн Цэц Ерөнхийлөгчид нэр дэвшигчтэй холбоотой маргааныг эцэслэн, АНУ-д суугаа Онц бөгөөд Бүрэн эрхт Элчин сайд Ё.Отгонбаярыг эгүүлэн татах болоод С.Зориг агсны амийг хөнөөсөн хэргийн зарим хэсгийг нууцаас гаргах асуудлыг ч ойрын хугацаанд хэлэлцэн шийдвэрлэнэ.

УИХ-ын Хаврын чуулганы бас нэгэн “сюрприз” нь Ж.Эрдэнэбат гишүүн байх аж.

Тэрбээр 2020 оны УИХ-ын сонгуульд Сэлэнгэ аймагт нэр дэвшин өрсөлдөж байхад нь шүүхээс баривчлан саатуулж, улмаар ял оноосон юм. Эл хэргийг Улсын Дээд шүүх хяналтын шатны хуралдаанаараа хэлэлцээд анхан болон давж заалдах шатны шүүхийн шийдвэрийн хүчингүй болгосноор Ж.Эрдэнэбатыг сулласан. Харин тэрбээр өнөөдөр бүрэн эрхийнхээ хүрээнд УИХ-ын гишүүний тангаргаа  өргөнө гэдгийг эх сурвалж хэлж байна.

У.Тэргэл