Энэ оны эхний улиралд багтаан манай улс AstraZenece вакцины 112800 тун, Pfizer/BioNTech вакцинаас 25740 тунг COVAX хөтөлбөрийн хүрээнд хүлээн авахаар болсон юм. Үүний эхний 14400 тун болох AstraZeneca вакциныг өнгөрсөн баасан гарагт манай улс хүлээн авсан. Цар тахлын дэгдэлт эхлэж байгаа энэ цаг үед хандивлагчдын илгээсэн вакциныг хүлээн авсан нь итгэл найдварыг сэргээсэн үйл явдал байсан юм.

Харамсалтай нь, Гадаад харилцааны сайд Б.Батцэцэг, Эрүүл мэндийн сайд С.Энхболд, ДЭМБ-ын суурин төлөөлөгч Др Сергей Диордица , НҮБ-ын Хүүхдийн сангийн суурин төлөөлөгч Алекс Хайкенс нар оролцсон COVAX хөтөлбөрийн вакциныг хүлээн авсан тухай Гадаад харилцааны яамны албан мэдээ энэ амралтын өдрүүдэд гадаад харилцаанд сэв суулгах шахав.

Албан мэдээндээ хандивлагчдад талархлаа илэрхийлээгүйд нь Европын холбооноос манай улсад суугаа Онц бөгөөд Бүрэн эрхт Элчин сайд дургүйцлээ илэрхийлсэн.

Хамгийн том хандивлагчдын нэгэнд ингэж талархал илэрхийлээгүй мэт буруу ойлголт төрүүлсэндээ Гадаад харилцааны яам, Хэвлэлийн албанаас нь уучлалт хүсэх ёстой байтал арга хэмжээн дээр хэлсэн Б.Батцэцэг сайдын үгийг сошиалаар явуулан “хэрүүл”-ийн шинжтэй ажилцгаасан юм. Дээр хэлсэнчлэн COVAX хөтөлбөрийн вакциныг хүлээн авах арга хэмжээнд манай улсын хоёр сайдаас гадна ДЭМБ, НҮБ-ын суурин төлөөлөгчид оролцсон.

Тэр арга хэмжээн дээр Гадаад харилцааны сайд Б.Батцэцэг хандивлагчдад талархал илэрхийлсэн нь ч үнэн. Харин нийтэд түгээсэн албан ёсны мэдээн дээрээ энэ тухай огт дурдаагүй байсан нь ч бас үнэн билээ.

Арга хэмжээнд уригдаагүй хандивлагчийн хувьд албан мэдээнээс мэдээллийг харсан нь тодорхой. Ийм тодорхой нөхцөл байдалд Гадаад харилцааны яам дипломат ёсны алтан зарчмаа дагаад уучлал гуйгаад асуудлыг намжаах ёстой байтал улам дэвэргэн сошиалаар троллдов. Уг нь гадаад харилцаанд гарсан асуудлыг аль болох намжаах нь, эв зүйгээр шийдэх нь дипломатуудын хамгийн эхний ур чадвар байдаг. Гэтэл Гадаад харилцааны дэд сайд Б.Мөнхжин өөрийн твиттэр хуудсаар дамжуулан үл хүндэтгэсэн, асуудлыг дэвэргэн талцуулахгүй байхыг уриалангаа талцуулсан ийм мэдээлэл бичээд сууж байв.

Монголын улс төрд улиг болсон шар мэдээллийг дарж авдаг хар аргаа Гадаад харилцааны дэд сайд ингэж гадаад харилцааны бодлого дээр ашиглав. Үнэхээр л албан мэдээлэл дээрээ алдаа гаргасан нь үнэн юм чинь уучлал гуйгаад, асуудлыг намжаах байтал дэлхийн хоёр дахь том эдийн засгийн нэгжийн Элчин сайдтай сошиалаар хэрэлдээд сууж байдаг Гадаад харилцааны дэд сайдтай гэдгээ энэ өдрүүдэд харж авав. Төрийн албаны, тэр тусмаа алтан аргамжийг барьж байдаг гадаад харилцааны салбарт крандуулаад очиж болдоггүй юм гэдгийг ийм өндөр үнээр монголчууд бид харлаа.

С.Сүлд