2021 оны хаврын ээлжит чуулган өнөөдөр нээлтээ хийж, УИХ-ын дарга Г.Занданшатар чуулганыг нээж хэлсэн үгэндээ, С.Зориг агсны амийг хөнөөсөн хэрэгтээ ял эдэлж буй Т.Чимгээд холбогдох хэргээр УИХ-аас Хянан шалгах түр хороог байгуулах шаардлагатай гэдгийг тодотголоо.

Тодруулбал, “Шүүх, эрх мэдэлд үүссэн гажуудал, ёс зүйн манлайлалгүй, шүүх засаглалын нэр хүндэд халдсан зарим шүүгчид одоо ажиллаж байгаа Ёс зүйн хороо, Шүүхийн ерөнхий зөвлөл хариуцлага тооцож ажиллахгүй, толгойг нь илж байна. Нөгөө талаараа хуулийн байгууллага хэрэг мөрдөх, шалгах явцдаа иргэний эрхийг зөрчихгүй байх тодорхой саналыг ойрын хугацаанд бэлтгэж, УИХ-д өргөн барихыг үүрэг болгож байна.

Монгол Улсад эрүү шүүлт иргэндээ тулгасан бусармаг үйлдэл дахин  хэзээ ч гарах ёсгүй. Хуулийн байгууллагын хүний эрхэд илт халдаж, ял хүлээлгэдэг бичлэг, гомдол их ирж байна. Шударга ёс хуулиар тогтох ёстой. УИХ-ын тухай хуулийн Хяналт шалгалтын хуулийг хэлэлцэн батлах ёстой. Энэ хаврын чуулганаар хэлэлцэн батлах шаардлагатай байна. Тухайлбал, иргэн Т.Чимгээд холбогдох хэргийн хүний эрхийн зөрчил гаргасан эсэх асуудлаар УИХ-аас Хянан шалгах түр хороог байгуулж ажиллах ёстой” гэлээ.