УИХ дахь Ардчилсан намын бүлгийн гишүүд хоёр хуваагдаад буй намынхаа удирдлагуудтай уулзаж, зөвшилцөх ажлын хэсэг байгуулжээ.

Тодруулбал, тус намын бүлгийн дарга Д.Ганбат, С.Одонтуяа тэргүүтэй 11 гишүүн Ц.Туваан, С.Эрдэнэ нартай уулзсан байна. 

Улмаар Ардчилсан намд үүсээд байгаа нөхцөл байдлын талаар ярилцаж, эцэст нь Ардчилсан намын дарга С.Эрдэнэ, УИХ дахь АН-ын бүлгийн дарга Д.Ганбат нар хоёр талаасаа гурав гурван хүнтэй ажлын хэсэг байгуулж, зөвшилцөхөөр болсон байна. 

Гэхдээ Ардчилсан намын тамгыг атгаж суугаа С.Эрдэнэ бүх удирдлагыг гартаа авахаар гэдийсээр байгаа гэх. Тэрбээр Ардчилсан намын даргын сонгуульд нэр дэвшигчдийг энэ сарын 19-ны өдрөөс бүртгэж, дөрөвдүгээр сарын 25-ны өдөр тодруулна хэмээсээр байгаа.

Харин түүнийг ийнхүү нам дотроо хагарал үүсгэж байгаагийн цаад шалтгааныг Ерөнхийлөгчийн сонгуультай холбоотой гэдгийг ч зарим улс төрчид хэлдэг. Тодотговол УИХ-ын гишүүн С.Ганбаатар "С.Эрдэнэ тэргүүтэй Ардчилсан намынхан өнөөдөр Сү.Батболдод нохой шиг үйлчилж байна. Өнөөдөр парламентад суудалтай дөрвөн нам дөрвүүлээ Сү.Батболдын халаасанд орчихоод байна" гэдгийг мэдэгдээд амжсан. Тэгэхээр С.Эрдэнэ Сү.Батболд тэргүүтэй МАН-д үйлчилж, намынхаа эрх ашгийг уландаа гишгэж, худалдагдсан уу гэх хардлага ч олон нийтийн дунд хөвөрч байгаа юм. 

Ямартай ч Ардчилсан намд өрнөөд буй талцал эрчийг авч, намын бүлгийн гишүүд нь үүнд анхаарал хандуулж эхлэв.

Эх сурвалжийн мэдээлж буйгаар зөвшилцөх ажлын хэсгийн дараагийн уулзалт маргааш буюу гуравдугаар сарын 17-нд болохоор товлогдсон бөгөөд тус уулзалтад Ерөнхийлөгч Х.Баттулга оролцохоор яригдаж байгаа гэх. 

Б.Баатар