Монгол Улсаас АНУ-д суугаа Онц бөгөөд Бүрэн эрхт Элчин сайд Ё.Отгонбаярыг эгүүлэн татах асуудлыг маргааш буюу гуравдугаар сарын 18-ны өдрийн УИХ-ын чуулганы нэгдсэн хуралдаанаар хэлэлцэнэ. 

Монгол Улсын Ерөнхийлөгч Х.Баттулга Элчин сайд Ё.Отгонбаярыг эгүүлэн татах асуудлыг зөвшилцөхөөр УИХ-ын дарга Г.Занданшатарт албан бичиг хүргүүлсэн билээ. 

Тэрбээр Ё.Отгонбаярыг эгүүлэн татах үндэслэлдээ, "Элчин сайд Ё.Отгонбаярын ажилласан сүүлийн гурван жилийн хугацаанд хоёр орны худалдааны эргэлт, хөрөнгө оруулалт, эдийн засгийн хамтын ажиллагаанд дорвитой ахиц гарсангүй. Монголын ноос, ноолууран бүтээгдэхүүнийг АНУ-ын зах зээлд татварын хөнгөлөлттэй экспортлох боломж бүрдүүлэх “Гуравдагч хөршийн худалдааны тухай” хуулийн төслийг АНУ-ын Хууль тогтоох байгууллагаар батлуулах талаар хангалттай санаачилга гаргаж ажилласангүй. Тухайлбал, АНУ-ын 116 дугаар Конгресст хуулийн төслийг хариуцаж байсан холбогдох Байнгын хороодын дарга нартай Элчин сайд нэг ч уулзалт хийгээгүй нь уг ажлыг эс үйлдлээр гацаасан, бодит үр дүнд хүргэхийн оронд аргацаасан гэж үзэж байна.

Түүнчлэн Элчин сайд Ё.Отгонбаяр нь манай улсын байгалийн баялгийн орлогыг нэр бүхий улстөрчид гадаадад, оффшор дансанд байрлуулсан байж болзошгүй асуудлаар АНУ-ын Нью-Йорк мужид явагдаж буй шүүхийн маргааны талаар хуулийн байгууллагын шийдвэр гараагүй байхад олон нийтийн сүлжээгээр дамжуулан илт улс төржсөн байр суурь илэрхийлсэн нь Дипломат албаны тухай хуулиар хүлээсэн үүрэг болон төрийн албан хаагчийн ёс зүйд нийцэхгүй юм" гэдгийг онцолсон байв. 

Дээрх асуудлыг УИХ-ын Аюулгүй байдал, гадаад бодлогын байнгын хорооны хуралдаанаар хэлэлцэх үеэр УИХ-гишүүн Н.Алтанхуяг "Улсаа төлөөлөөд сууж байгаа хүн улсынхаа ажлыг хийх ёстой. Гадаадад сууж байгаа Элчин сайдууд амралтын газар очсон юм шиг л байх юм. Та нар улсаас мөнгө төгрөг авч ажилладаг. Наад хэлсэн зүйлүүд чинь үнэн бол Элчин сайдаас Ё.Отгонбаярыг шууд татах хэрэгтэй. 

Улс орны эрх ашиг нэгдүгээрт байх ёстой атал  дандаа амин хувиа хичээсэн, арчаагүй, хувийн ажил хийх юм. Тэд хүмүүсийн хувийн төлөөлөгчөөр ажилладаг. Дарга нар очихоор далдаганаж гүйдэг ийм л амьтад Элчин сайд нэртэй суугаа байхгүй юу. Энэ одоо шүүгч үү. Шүүхэд яваа процессын талаар Ё.Отгонбаяр гэдэг хүн шүүхийн шүүгч болчихоод байгаа юм уу. Юу болчихоод байгаа юм" хэмээж байсан. Гэсэн ч тус байнгын хорооны гишүүд Ё.Отгонбаярыг эгүүлэн татах нөхцөл үүсээгүй хэмээн үзсэн. 

Тэгвэл УИХ дахь МАН-ын бүлгийнхэн мөн л намын нөхрөө эгүүлэн татах үндэслэлгүй хэмээн үзэв. 

Ингэхээр маргааш болох чуулганы нэгдсэн хуралдаанаар дээрх асуудлыг хэлэлцээд олонхын дэмжлэг авахгүй, Ерөнхийлөгчийн санал унах нь тодорхой боллоо. 

Ерөнхийлөгч Х.Баттулга Элчин сайд Ё.Отгонбаярт "муу" дүн тавьж, эгүүлэн татахыг хүссэн ч МАН-ынхан олонхоороо түүний "дүнг засч", авч үлдэхээр шийдсэн бололтой. 

Б.Баатар