УИХ-ын чуулганы үдээс хойшхи хуралдаанаар цар тахлын нөхцөл байдлын талаар Шадар сайд мэдээлэл өгч байна.

УИХ-ын гишүүн Б.Энхбаяр “Баянзүрх дүүргийн XXVI хороо гэнэтийн сюрприз  барилаа. Ерөнхий сайд нь гэнэтийн хөл хорио, хязгаарлалт тогтоохгүй. Урьдчилан заавал мэдэгдэнэ гэдгээ олон нийтэд зарлачихсан. Гэтэл өглөө босч ирэнгүүт хорьчихсон. Хүмүүст ажлаа төлөвлөх боломж олгодоггүй юм уу. Ядаж л ажлаасаа компьютерээ авчраад гэрээрээ ажлаа хийх боломжийг нь олгодоггүй юм уу.

Өвчтэй зовлонтой хүн байвал яах вэ. Тус хороо 31 мянган хүн амтайгаас 16 мянга нь насанд хүрээгүй буюу 40 хүртэлх насны залуучуудтай. Яагаад ингэж гэнэтийн шийдвэр  гаргав гэтэл ЭМЯ-наас шийдвэр ирсэн гэсэн. УОК энэ талаар мэдэж байгаа юу. Эсвэл хэл амнаас айгаад бие бие рүүгээ чихээд хариуцлагаас мултрах гээд байгаа юм уу. Яагаад иргэддээ итгэхгүй байгаа юм бэ. Төр нь бидэнд итгэ гээд байдаг. Иргэд итгэж ирсэн. Гэтэл оргож зугтдаг гэх утгагүй тайлбар хэлээд сууж байх юм.

Шадар сайд С.Амарсайхан:

-УОК ямар үед ямар шийдвэр гаргав. Зохион байгуулалтын хувьд ямар арга хэмжээ авав. Энэ талаараа нийслэл, дүүрэг аймаг, орон нутгийн удирдлагуудад чиглэл өгч,  мэдээллээр ханган ажиллаж байгаа. Баянзүрх дүүргийн XXVI хороонд шинжилгээг авч дуусаад, үргэлжлүүлэн вакцинжуулах ажлыг эхлүүлнэ. Энэ бүгдийг богино хугацаанд амжуулна. Заавал урт хугацаанд хөл хориод байх шаардлагагүй гэж үзэж байгаа.

У.Тэргэл