УИХ-ын хаврын ээлжит чуулганы үдээс хойшхи хуралдаан эхэллээ.  

Хуралдааны эхэнд УИХ-ын гишүүн Б.Пүрэвдорж Дэгийн тухай хуульд заасны дагуу үг хэлэх зөвшөөрөл УИХ-ын даргаас хүссэн тул үг хэллээ. 

Тэрбээр "”Ард түмний 10 хууль” хуулийн төсөл өргөн барьсан. Үүний 3-4 хуулийн төслийг энэ чуулганаар батлуулахаар ажиллаж байна. Хамгийн гол нь иргэдийн амьдрал, орлого хүнд байгаа тул НӨАТ-ыг 5 хувь болгох хуулийн төсөл өргөн барсан. Энэ нь улсын орлогод нөлөөлөхгүй. Тиймээс НӨАТ-ыг 5 хувь болгох хулийн төслийг оруулж өгөөч.

Мөн иргэдийн автомашиныг эвдээд байгаа хуурамч шатахууны эсрэг хуулийг оруулж, хэлэлцүүлж өгөөч.

Яагаад хэлэлцэх асуудлын жагсаалтад орохгүй байгаа юм. Зарим Их Хурлын гишүүд нийлээд лобби оруулаад байдаг юм уу. Төсвөөс болон иргэдээс 340 тэрбум төгрөг хулгайлна. Дээр нь иргэдийн автомашинд хэчнээн төгрөгийн хохирол учруулж байгааг тооцоолох аргагүй.

Гуравдугаарт, тэтгэвэр тогтоохдоо сүүлийн 5 жилээр тооцдог байсныг 7 жил болгосон. Үүнийг буцаагад 5 жил болгох хуулийн төсөл өргөн барьсан. Энэ хуулийг баталснаар хамгийн багадаа 500.000-2 сая төгрөг олох боломж бий болох юм. Шударгаар шимтгэл төлсөн иргэнд буцаагаад өгөх болохоор мөнгийг нь багасгаад байдаг. Энэ хуулийн төслийг оруулаад өгөөч” гэлээ.

Б.Лхам