Монгол Улсаас АНУ-д суугаа Онц бөгөөд Бүрэн эрхт Элчин сайд Ё.Отгонбаярыг эгүүлэн татах асуудлыг УИХ-ын чуулганаар хэлэлцсэн ч дэмжээгүй билээ. Энэ үеэр сөхсөн нэгэн ноцтой асуудал бол Элчин сайд Ё.Отгонбаярын цахим шуудан руу хэн нэвтэрч, албан бичгийг нь олон нийтийн сүлжээнд ил болгов гэдэг. Элчин сайдын цахим хаяг руу нэвтрэхэд тусгайлан нууц үг, зөвшөөрөл шаардлагатай  байдаг. Энэ бүхэн рүү нэвтрэх эрхтэй хүн хэн бэ. Энэ нь ганц Элчин сайдынх бус төрийн нууцад нэвтэрч ил болгож буй ноцтой хэрэг гэдгийг гишүүд онцолж, эзнийг нь олох ёстой хэмээж байсан билээ. Тэгвэл энэ удаад чуулганы танхимд болохгүй, бүтэхгүйгээрээ дуудуулсан Элчин зөвлөх Индранилын нэр эн тэргүүнд дуулдаж байна. Түүнд ийм бүрэн эрх нь бий аж. Энэ талаар УИХ-ын гишүүн Г.Дамдинням болон Гадаад харилцааны сайд Б.Батцэцэг юу хэлснийг хүргэе.

УИХ-ын гишүүн Г.Дамдинням: Зандаахүүгийн Энхболдын дүү Индранил гэж нэг нөхөр Гадаад харилцааны яаманд гуравхан сар ажиллачихаад Элчин зөвлөх буюу Элчин сайдын дараагийн албан тушаалд томилогдсон. Архи уугаад, амьтан хүн зодоод бужигнуулаад яваа дуулдах юм. Гадаад харилцааны сайд энэ хүнээ татахаа боддоггүй юм уу, мэргэжлийн тусгай байгууллагынхаа  хүмүүсийн  чанар чансаанд анхаардаггүй юм уу. Түүнийг бас шалгах хэрэгтэй хэмээсэн.

Харин Гадаад харилцааны сайд Б.Батцэцэг: ЭСЯ-ны албаны цахим хаягуудад нэвтрэх нууц үг болон буюу интернэтийн компанитай хийсэн гэрээ, тухайн компанитай  харилцах эрх Элчин зөвлөх  Индранилад байдаг. Элчин сайдын яамны  албаны цахим шуудан алдагдсан талаар нууцын эрхлэгч гуравдугаар нарийн бичгийн дарга Отгонжаргалын гаргасан тайлбар болон нийт дипломат ажилтнуудын тэмдэглэлийг хүлээж авсан. Элчин сайдын мэдээлэл алдагдсантай холбоотой тайлбар мэдээллийг бид нягталж байгаа. Индранил гэж Элчин зөвлөхийн асуудлыг бид яамныхаа удирдлагын төвшинд ойрын хугацаанд ярьж, шийдвэр гаргана гэж бодож байгаа гэв.

Зандаахүүгийн Энхболдын дүү Индранил гэгчийг эгүүлэн татах асуудлыг Гадаад харилцааны яамны холбогдох албан тушаалтнууд  хуралдан, хэдийнэ шийдвэрээ гаргасан гэх. Хамгийн гол нь, Ё.Отгонбаяр сайдын цахим шууданг олонд ил болгосон хэрэгт ч түүнийг мөн  хардан шалгуулахад илүүдэхгүй гэдгийг гишүүд хэлж байгаа. Ямартай ч, эн тэргүүнд эгүүлэн татах асуудлыг тавьж, дараа нь яамны цахим шууданд нэвтрэх эрхээ ашиглан энэ мэт хууль бус үйлдэл хийсэн эсэхийг хууль хяналтын байгууллагаар шалгуулахаар тогтсон байна.

У.Тэргэл