УИХ дахь Ардчилсан намын бүлгийн гишүүн С.Одонтуяа, Б.Пүрэвдорж, Н.Ганибал нар төр, нийгмийн зүтгэлтэн Г.Батхүү агсны хэргийг хаах болсонтой холбоотойгоор өнөөдөр мэдээлэл хийлээ. 

УИХ-ын гишүүн С.Одонтуяа: Хоёр жилийн өмнө буюу 2019 оны тавдугаар сарын 17-ны өдөр Төрийн ордонд Г.Батхүү агсан цаг бусаар амиа алдсан байдаг. Энэ хэрэгт ЦЕГ-ын Хүнд гэмт хэрэгтэй тэмцэх хэлтсээс нууцлалын өндөр зэрэглэлтэйгээр хэргийг мөрдөн шалгаж байсан. Ардчилсан намын гишүүд өнгөрсөн хугацаанд хууль хяналтын байгууллагын ажлыг хүндэтгэж, тэвчээртэйгээр дүгнэлт гарахыг хүлээсэн. Гэтэл саяхан хэргийн эзэн тогтоогдохгүй байна гэх үндэслэлээр Нийслэлийн прокурорын газарт хэргийг хаах саналыг явуулсан байна гэсэн мэдээлэл авлаа. Энэ хэргийг тойрсон маш олон ойлгомжгүй учир битүүлэг асуудлууд байгаа учраас хэргийг хариуцлагатайгаар мөрдөн шалгаач гэсэн шаардлагыг бид холбогдох байгууллагад нь тавьж байна. Г.Батхүү агсны 13 секундийн бичлэгийг өгсөн гэх залуу амь насаа учир битүүлгээр алдсан талаарх мэдээлэл явсан. Одоогоор үгүйсгэсэн эсвэл нотолсон мэдээлэл байхгүй байна. Үүнийг тодорхой болгох ёстой. Нөгөөтэйгүүр, яг жилийн өмнө Г.Батхүү агсны гэр бүлийн гишүүдтэй өмгөөлөгч Ж.Батхуяг хэд хэдэн мэдээлэл хийсэн. Өөрөөр хэлбэл, шинжилгээний дүнд сэтгэл хангалуун биш байна, буруу гарсан гэх хэд хэдэн дүгнэлт хэлсэн. Түүнчлэн гар утсан дээрх мэдээллийг устгасан гэсэн асуудлыг ярьсан. Хэвлэлийн хурал тарсны дараагаар өмгөөлөгчийг мөрдөн байцаалтын нууц задалсан гэх хэргээр ял сонсгосон байдаг. Тиймээс бид энэ хэргийг нийтэд ил болгооч, ингэж учир битүүлгээр бүү хаагаач гэдэг шаардлагыг хариуцлагатайгаар тавьж байна.

УИХ-ын гишүүн Б.Пүрэвдорж: МАН засаг барьж байх үед Төрийн ордонд хүн амины ноцтой хэрэг гарсан. Бид хүн амины ноцтой хэрэг гэж бид үздэг. Яагаад гэвэл хүзүүнд нь боолтын ором орсон, дээрээс унахад хөхрөлт нь өөр газар гарсан зэрэг хэргийн газрын анхны дүгнэлтүүд байдаг. Нотлох баримтуудыг мухарлахгүйгээр хэргийг хаана гэдэг байж боломгүй.Тиймээс энд албан тушаалтнуудын нөлөө орсон байх гэж үзэж байна. Иймд гол асуудлыг шийдвэрлэхгүйгээр, ар гэрийнхнийг нь гомдлыг тайлахгүйгээр хэргийг хаана гэдэг нэлээдгүй асуудал үүсгэх болно шүү гэдгийг хууль хяналтын байгууллагынханд анхааруулъя.