Өнөөдөр /2021-3-22/ ажил тарах үед нэгэн мэдээлэл тарав. “Ерөнхийлөгч Х.Баттулга нэр дэвших эрхтэй гэж Үндсэн хуулийн Цэц шийдвэрлэжээ” гэсэн гарчиг, агуулга бүхий мэдээ зарим сайтад тавигдаж, Ерөнхийлөгчийн эргэн тойрныхон “сэвээд” сүйд хийлээ.

Мэдээнд “Өнөөдөр Үндсэн хуулийн Цэцийн Бага суудлын хуралдаан үргэлжилж,Т.Доржханд, Д.Үүрцайх нарын нэр бүхий иргэдийн мэдээллийн дагуу маргаан үүсгэсэн Цэцийн гишүүн Д.Солонгын шийдвэрийг хүчингүй болгож, Ерөнхийлөгч Х.Баттулга ирэх Ерөнхийлөгчийн 2021 оны сонгуульд нэр дэвших эрхтэй болохыг тогтоосон шийдвэр гарчээ” гэж бичсэн байна.

Энэ талаар иргэн Д.Ламжав ч “Цэцийн гишүүний тогтоол, Цэцийн бага суудлын хуралдаан Үндсэн хуулийн маргааныг шийдвэрлэсэн шийдвэр гаргадаггүй. Харин Цэцийн гишүүний тогтоолыг бага суудлаар хэлэлцэж болдог бөгөөд холбогдох өргөдөл, мэдээллийн талаар Үндсэн хуулийн маргааныг Цэцийн дунд буюу их суудлаар хэлэлцэх эсэх шийдвэр гаргах хуультай. 2021 оны сонгуульд хэн ч дахин нэр дэвших эрхтэй болсон мэтээр буруу мэдээлэл цацлаа. Цэцийн бага суудал энэ асуудлыг огт хөндөөгүй” гэж байр сууриа илэрхийлсэн байна. Өөрөөр хэлбэл, ямар нэг шийдвэр гараагүй. Худлаа мэдээлэл гэсэн үг.

Тэгэхээр Ерөнхийлөгч яагаад ийм “ойрын зайны тоглолт” хийв ээ. Аргаа барав уу. Ер нь бол ойлгомжгүй байгаа юм.

Юутай ч хөшигний ард өөр явдал болж, яриа хөөрөө өрнөжээ.

Өнөөдөр Дээд шүүх дээр Үндсэн хуулийн Цэцийн гишүүдийг сонгох санал хураалт болсон. Хоёр гишүүн сонгох ёстой. Гэвч 17 нэр дэвшигчээс Ж.Эрдэнэбулганыг сонгож, удаах “орон тоо”-д нь хүрсэн санал авсан хүн гарсангүй. Ерөнхийлөгчийн хувьд судлаач О.Машбатыг зүтгүүлсэн нь ч тэр нь уначихсан байна.

Дээд шүүхийн хуралдааны дараа Үндсэн хуулийн Цэц дээр Ц.Нанзаддорж, Ш.Цогтоо нар “Бага суудлын хуралдаан” нэрээр тогтоол гаргаж, түүнийг нь олон нийт ийн “орчуулж” хүргэсэн байгаа юм.

Үүнд Үндсэн хуулийн Цэцийн гишүүд нэлээд дургүйцэж “Ерөнхийлөгч энэ хоёр нөхрөөсөө болж эвгүй байдалд орох вий. Өмнө нь Үндсэн хуулийн Цэцэд ингэж хүндэтгэлгүй хандсан нэг ч Ерөнхийлөгч байхгүй дээ” гэцгээжээ.

Дашрамд дурдахад Бага суудлын хуралдааны “шийдвэр” гаргасан Ш.Цогтоогийн бүрэн эрх гурав хоногийн дараа дуусгавар болж Үндсэн хуулийн Цэцээс явах юм.