Боловсрол, шинжлэх ухааны сайд Л.Энх-Амгалан цаг үеэ олоогүй, мэдрээгүй нэгэн шийдвэрийг гаргажээ. Энэ нь, ерөнхий боловсролын сургуулийн сурагчдын хоёрдугаар улирлын амралт гуравдугаар сарын 29-нөөс ирэх дөрөвдүгээр сарын 5-ны өдрийг хүртэл үргэлжлэх байсан. Тэгвэл тус амралтын долоо хоногийг цуцалж, энэ хугацаанд теле болон цахим хичээлийг үргэлжлүүлэн явуулах тушаалыг гаргасан нь олон эцэг, эх, багш нарыг бухимдуулахад хүргээд байна.

Хоёрдугаар улирлын амралтаар долоо хоног ч болов хүүхдүүд, эцэг, эхчүүд компьютерийн дэлгэцнээс холдож, нүдээ амрааж, хүүхдүүд нь агаар салхинд гарч, амсхийх цаг гарах нь хэмээн олзуурхаж байтал сайдын цаг үеэ мэдрээгүй, ухаангүй энэхүү шийдвэр ийн бухимдах шалтгаан болох нь.

Өнгөрсөн хугацаанд олон сарын турш дэлгэцийн өмнөөс салаагүй хүүхдүүд, ялангуяа бага ангийнхан теле хичээлээс залхаж, эцэстээ багшдаа дүнгээ тавиулах гэж л хичээлээ дуртай, дургүй хийсээр, эцэстээ уйлаан болоод дуусч байна. Бүтэн өдөржин дэлгэцийн өмнө уяж, хичээл, нэмэлт хичээл, давтлага, даалгаврыг 17 цагаас өмнө хийж, амжиж багш руугаа явуулна. Багш нь буруу, зөв хийснийг нягтлаад дутуу зүйлийг хийх нэмэлт даалгавар өгнө. Түүнийг нь орой болтол нүдээ чилтэл хийнэ. 

Хамгийн гол нь, хүүхдүүд өдрийн тэн хагасаас илүүтэйг компьютерийн дэлгэцийн өмнө бөгтийн өнгөрүүлж байна.

Үүнээс болж дархлаа нь сулрах, нүдний хараа нь муудах, хичээлдээ дургүй болж, уурлаж ундууцах энүүхэнд болж, хүүхдүүдээ дагаад эцэг, эхчүүд ч стресст орж, юун дархлаа дэмжих эсрэгээрээ гэр бүлээрээ олон сарын теле болон цахим хичээлээс  болж зутарч, залхаж, цөхөрч гүйцээд байна. Удалгүй сульдаатай, нүдний хараа муу, дэлгэцийн хамааралтай, уур уцаартай хүүхдүүд олширч, ирээдүйгээ бид ингэж л “хөнөөж” байна.

Мөн үнэхээр их хичээл зүтгэл гаргаж буй багш нарыгаа орхиж боломгүй. Хүүхдүүдээсээ илүү дэлгэцийн өмнө “уягдаж”, шавь нарынхаа маргаашийн хичээлд бэлтгэнэ, шөнөжин сууж тайлангаа бичнэ, илгээнэ. Бие даалтаа хийнэ. Багш, хүүхдүүд робот биш гэдгийг эндээс ойлгож болно.

Боловсрол шинжлэх ухааны сайд энэ бүхнийг тооцолгүй, үнэхээр цаг үеэ мэдрээгүй, мэдрэмжгүй шийдвэрийг гаргалаа. Харин эсрэгээрээ амралтын хугацааг хүүхдүүддээ зориулъя. Тэдэнд амралт, чөлөөт цаг хэрэгтэй хэмээн ирээдүй үрсээ бодсон шийдвэр гаргасан бол таныг энэ салбарт томилоход талархан хүлээн авсан олон хүн сонголтдоо эргэлзэхгүй байлаа.

Хөл хорио,  цаг наргүй үргэлжлэх дэлгэцийн “амьгүй” буюу теле хичээл, ид гүйж наадах насаа гэртээ өнгөрүүлэх хүүхдүүд, найз нартайгаа аминчхан яриа өрнүүлж, болзоонд зогсох охид, хөвгүүд. Энэ бүхнийг золиослож буй ирээдүйгээ ойлгох ухаан Боловсролын сайдад дутлаа гэж үү.  Гэхдээ танд энэ бүхнийг засч,  залруулах цаг хугацаа  байна.

У.Тэргэл