Зүрхний эмгэгтэй төрсөн Очир хүүд АНУ-ын сайн дурын байгууллага туслахаар болсон сайхан, таатай мэдээ ирлээ.
  Долоон сартай Очир хүүг дөнгөж төрснийх нь дараа зүрх нь цоорхой гэсэн гашуудам мэдээг эмч нар ээж Э.Сүндэрт нь дуулгасан байна. Ийм өвчтэй хүүхдүүдийн адил найман сар хүрэхээс нь өмнө заавал хагалгаа хийлгэх ёстой. Хоёр, гурван нас хүрвэл эмчилгээ хийх боломжгүй болдог гэж эмч нар хэлжээ. Гэхдээ ийм хагалгааг Монголд хийх боломжгүй тул ээж, аав нь энэ хугацаанд Орос, Хятад, Солонгос, АНУ-ын эмнэлгүүдийг судалсан байна. Азийн оронд зүрхний цоорхойг нөхөхөд 60 мянган доллар, харин АНУ-д 100 мянган доллар байдаг. Тиймээс тэд хүүгээ гадаад руу авч явж эмчлэх зардал, хандив хайж эхэлсэн байна.

    Азаар тэд өнгөрсөн дөрөвдүгээр сард АНУ-ын Техас мужид төвтэй “HeartGift” гэдэг төрийн бус байгууллагатай интернэтээр холбогдож чаджээ. “HeartGift” нь Монгол зэрэг хөгжиж буй орнуудын зүрхний эмгэгтэй хүүхдүүдэд туслах зорилготой сайн дурын байгууллага аж. Аз тохиосон ээж, хүү хоёр өнгөрсөн долоо хоногт гучин цаг ниссэний дараа АНУ-д New Orlean-д иржээ. Энэ мужид байдаг “Covington” эмнэлэгт Очир хүүгийн мэс заслыг  хийх бөгөөд эмнэлгийн захирал  Kendra France,  Kyle France нарыг эмчилгээний үед эх, хүү хоёрыг гэртээ байхыг хүссэн байна.
    Очир хүүд өнөөдөр зүрхний цоорхой нөхөх мэс засал хийхээр төлөвлөөд байгаа бөгөөд мэс заслын дараа сар гаруйн хугацаанд Kyle France-ийн гэрт тэнхэрч, эмчлүүлэхээр болжээ. Эмч нар хагалгаа амжилттай болно гэдэгт итгэлтэй байгаагаа хэлсэн гэнэ.