Цэцийн дээр хөх тэнгэр гэдэг. Гэтэл өдгөө Цэц нь хүртэл улстөржиж, тэдний дээр Ерөнхийлөгч залрав бололтой. Монгол Улсын Ерөнхийлөгчийн хувьд тэрбээр Цэц дээр хоёр ч удаа өөрөө гүйн очиж, намба алдсан. Энэ нь ч нөлөөлсөн бололтой. Өдгөө Үндсэн хуулийн Цэц хөл толгойгоо алдлаа.

Үндсэн хуулийн Цэцийн дунд суудлын хуралдаан өнгөрсөн баасан гарагт болж, Монгол Улсын Ерөнхийлөгчид зохих босго, шаардлагыг хангасан бүх хүн Ерөнхийлөгчийн сонгуульд өрсөлдөх эрхтэй хэмээн шийдвэрийг гаргасан хэмээн хэсэгтээ шуугьсан. Үүнээс үүдэн нийгэмд өмнөх болон өдгөөгийн Ерөнхийлөгчид сонгуульд өрсөлдөх эрхтэй боллоо хэмээн хэвлэлүүд мэдээлж эхэлсэн. Гэвч энэ талаар ҮХЦ юу ч дуугарсангүй.

Нөгөөтэйгүүр, Үндсэн хуулийн Цэцийн хуралдаан бүрэлдэхүүнтэйгээр тодруулбал, Ш.Цогтоо, Ц.Нанзаддорж, Д.Одбаяр нар хуралдан, Монгол Улсын Ерөнхийлөгчтэй холбоотой шийдвэрээ гаргаж, гарын үсэг зурж баталгаажуулах тэр мөчид Д.Одбаяр хаяж зугтсан талаарх хошин яриа ч хөвөрч байна.  Цэцийн асуудал үүгээр дуусахгүй.

Үндсэн хуулийн Цэцийн  хоёр гишүүний бүрэн эрхийн хугацаа дуусч, нэг жил хагасын хугацаанд “дуншин” байж арайхийн сонгон шалгаруулалтыг зарласан. Өдгөө Цэцэд хэлэлцэх ёстой маргаантай олон асуудал байсаар атал ажил нь алхам ч урагшилдаггүй энэ байгууллагыг Н.Чинбат гэгч эрхэм толгойлдог.

Үндсэн хуулийн Цэц есөн гишүүнээс бүрдэх бөгөөд тэдгээрийн гурвыг УИХ, гурвыг Монгол Улсын Ерөнхийлөгч, гурвыг нь Улсын Дээд шүүх санал болгосноор УИХ зургаан жилийн хугацаагаар томилдог.  Тиймдээ ч нэрийг нь өргөн барьсан байгууллагынхаа эрх ашгийг хамгаалахаар гишүүд нь гурван тийш хараад суучихдаг гэдэг нь үнэн бололтой. Энэ удаад ч улс төрийн маргаантай, нэг тийш нь шийдэх олон асуудлыг хууль журмын дагуу хэлэлэлгүй, нэг нь хуралдах гэхээр нөгөө нь гарч зугтдаг, санаатайгаар бултдаг байдал ил болж, арай дөнгүүрт тооцогддог Үндсэн хуулийн Цэцийн нэр хүнд шалдаа унаж байна.

Хэзээ албан ёсоор хуралдаж, маргаан, талцал үүсгээд буй олон асуудлыг нэг тийш шийдвэрлэхийг хэлж мэдэхгүй ч  улс төрийн цаашлаад Монгол Улсын Ерөнхийлөгчийн нөлөөлөлд орохгүй гэх баталгаа энэ байгууллагад алга. 

У.Тэргэл