Монгол Улсаас АНУ-д суугаа Онц бөгөөд Бүрэн эрхт Элчин сайд Ё.Отгонбаярыг эгүүлэн татах асуудлыг хөндөж, өнгөрсөн долоо хоногт УИХ-ын чуулганы нэгдсэн хуралдаанаараа хэлэлцсэн билээ. Улмаар гишүүдийн дийлэнх нь Ё.Отгонбаярыг эгүүлэн татах үндэслэлгүй хэмээн үзэж, Ерөнхийлөгчийн санал "унасан". 

Тухайн үед Монгол Улсын Ерөнхийлөгч Х.Баттулга түүнийг эгүүлэн татах үндэслэлдээ "Элчин сайд Ё.Отгонбаярын ажилласан сүүлийн гурван жилийн хугацаанд хоёр орны худалдааны эргэлт, хөрөнгө оруулалт, эдийн засгийн хамтын ажиллагаанд дорвитой ахиц гарсангүй.

Эдийн засгийг сэргээх, малчин ард иргэдийн амьдралыг сайжруулахад чухал үүрэгтэй, Монголын ноос, ноолууран бүтээгдэхүүнийг АНУ-ын зах зээлд татварын хөнгөлөлттэй экспортлох боломж бүрдүүлэх “Гуравдагч хөршийн худалдааны тухай” хуулийн төслийг АНУ-ын Хууль тогтоох байгууллагаар батлуулах талаар хангалттай санаачилга гаргаж ажилласангүй" хэмээсэн байдаг.

Тэгвэл эгүүлэн татах асуудал хөндөгдсөн нь Элчин сайд Ё.Отгонбаярт нэгийг бодогдуулж, ташуур өгсөн бололтой. Тэрбээр сүүлийн өдрүүдэд цахим хуудаснаа Элчин сайдын хувиар хийж хэрэгжүүлж буй ажлаа тайлагнах боллоо.

Хамгийн сүүлд гэхэд нэгэн сайн мэдээ дуулгав. Тодруулбал, тэрбээр цахим хуудаснаа "Сайн мэдээ. Монгол- Америкийн стратегийн түншлэлийн тухай тогтоол маргааш Сенатын хурлаар орох бололтой шиг" хэмээн мэдэгдэв. Энэ нь үнэхээр талархууштай. 

Мөн АНУ-д суугаа иргэддээ ч анхаарал хандуулжээ. Энэ талаар Ё.Отгонбаяр "Денверт байгаа өргөмжит консул Ж. Вагенландертай ярив. Боулдерт болсон зэвсэгт халдлагын үед Монгол иргэд өртөөгүй гэж мэдээлэв" хэмээн жиргэжээ. 

Б.Баатар