Өнгөрөгч долоо хоногийн чуулганы хуралдаанаар УИХ-ын гишүүн Ж.Эрдэнэбат тангаргаа өргөсөн. Энэ үеэр Ерөнхийлөгчийн чулганы танхимд хэлсэн үг олны анхаарлыг татаж, чихийг сэртхийлгэж байна. Тодруулбал, Ерөнхийлөгч Х.Баттулга өнгөрсөн парламентын 40 гаруй гишүүн ЖДҮХС-аас эрх мэдэл, албан тушаалаа ашиглан өөийн хамаарал бүхий этгээдэд зээл олгоход хөндлөнгөөс нөлөөлсөн асуудалд холбогдсон ч тунаж явсаар дөрөвхөн хүнээр төлөөлүүлэн ял эдлүүлж байгааг дурдаад,

“Энэ танхимын талаас илүү хувь нь гэмт хэрэгтэн байгаа. Их Хуралд орж ирж хамгаалагддаг” гэсэн юм.

2016 онд бүрдсэн парламентын гишүүдийг ийн хэлсэн бол хэн ч гайхахгүй. Анх ЖДҮХС-г олноороо нийлж дээрэмдсэн асуудалд 49 гишүүн нэр холбогдож байв. Хэвлэлд гарснаар шүү дээ. Тухайн үед Ерөнхий прокурорын алба хашиж байсан М.Энх-Амгалан өмнөх парламентынхнаас шударга ёсыг нэхэж, ЖДҮ-тэй холбоотойгоор ял аваад дөрвөн гишүүний бүрэн эрхийг түдгэлзүүлэх санал оруулсан ч эрх баригч нам хамгаалаад үлдэж байсан түүх бий. Тиймээс Ерөнхийлөгчийн хэлсэнчлэн гишүүд өөрийгөө хамгаалуулах гэж парламентын суудал руу тэмүүлдэг гэдэгтэй маргахааргүй мэт.

Ерөнхийлөгч Х.Баттулга дээрх үгийг зүгээр ч нэг тэмдэглэж хэлээгүй болов уу. Эрх баригч намаас ч тэр уг асуулаар дуугарах ёстой. Иргэдийн итгэл өгч хоёр дахь удаагаа олонх болгож сонгосон намын төлөөлөл нь гэмт этгээдүүдийн "набор" байв уу гэдгийг. Ерөнхийлөгч ч гэсэн бүх ард иргэдээс сонгогдсоныхоо хувьд шударга ёсыг түүчээлж, олны эргэлзээг тайлах ёстой.

Өнгөрөгч УИХ-ын сонгуулийн улс төрийн намуудын нэг онцлох зүйл нь шинэ залуу гишүүдээ дэмжиж, нэр дэвшүүлсэн явдал байсан. Хэрэв Ерөнхийлөгчийн хэлсэн үнэн бол бид гэмт хэрэгтнүүдэд их эрх эдлүүлж, гишүүний зөөлөн суудлаар бэлэг барьж хамгаалж буй болох нь.

Б.Лхам