УИХ-ын үдээс хойшхи чуулганаар Цэцийн гишүүнийг томилох, чөлөөлөх асуудлыг хэлэлцэж, АН-ын бүлгийн саналын дагуу маргааш үргэлжлүүлэн хэлэлцэхээр хойшлуулаад байна. Үргэлжлүүлэн Засгийн газрын тусгай сангийн тухай хуульд нэмэлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцэж байна.

С.Одонтуяа: Хүүхэдтэй холбоотой ямар ямар сан байна вэ. Монгол хүүхдүүдийг харж байхад дуу, бүжиг урлаг талаас гологдоод байдаггүй. Харин хүүхдийн сангийн мөнгийг хүүхдийн зуслан байгуулах зэрэгт зарцуулах нь зөв байх. Мөн олон улсын уралдаан тэмцээнд оролцох гэж байгаа хүүхдүүдэд дэмжлэг үзүүлнэ гэж заасныг дэмжиж байна.

Одоо Гэр бүлийн тухай хууль, Хүүхэд хамгааллын тухай хууль батлагдах гэж байна. Эцэг эх салахад тэтгэлэг тэтгэмжээ авч чадахгүй хүүхдийн эрх маш их зөрчигдөж байна.  Энэ дээр Эрсдэлийн сан байгуулж өгөөч гэсэн санал иргэдээс маш их ирж байна. Тиймээс Засгийн газрын тусгай сан байгуулж болох уу.

ХНХ-ын сайд А.Ариунзаяа: Хүүхдийн тэтгэлгийн төлбөр барагдуулалт муу байдаг. Шүүхийн шийдвэр гүйцэтгэх газар дорвитой арга хэмжээ авах шаардлагатай. Өнгөрсөн жил гадагш явах эрхийг нь хязгаарлана гэж байсан. 2019 онд тэтгэлэг авагч 16 мянган хүүхэд байхад ердөө 7000 нь тэтгэлэг авдаг гэсэн судалгаа гарсан.

Гэр бүлийн тухай хуулийн шинэчилсэн найруулгад эргэн төлөх нөхцөлтэй тэтгэлгийн сан байгуулах зохицуулат оруулсан.

Тухайн үед 2.6 тэрбумын санхүүжилт шаардлагатай гэж оруулсан. Гэхдээ Гэр бүлийн тухай хуулийг Иргэний хуультай уялдуулах шаардлагатай гэж үзээд Засгийн газар дээр буцааж татах шийдвэрээ гаргасан. Тун удахгүй сайжруулаад оруулж ирнэ.

Б.Лхам