УИХ-ын хуралдаанаар Үндсэн хуулийн цэцийн гишүүнийг томилох, чөлөөлөх асуудлыг хэлэлцэж байна. Тодруулбал, АН-ын бүлэг өчигдөр уг асуулаар завсарлага авсан. Уг хугацаа нь дуусжээ.

АН-ын бүлгийн дүгнэлтийг УИХ-ын гишүүн Н.Ганибал танилцууллаа. Тэрбээр “Үндсэн хуулийн цэцийн гишүүнийг томилох, чөлөөлөх асудлаар АН-ын бүлэг 5 хоногийн завсарлага авахыг хүсэн УИХ-ын дарга нэг хоногийн завсарлага өгсөн. Бид энэ давчуу хугацаанд УИХ-ын гишүүн Ж.Батсууриар ахлуулсан ажлын хэсэг байгуулж Цэцийн гишүүний томилгоотой холбоотой асуудлаар хуулийн хүрээнд тодруулга авсан. Үндсэн хуулийн цэцийн дарга Н.Чинбат, тамгын газрын болон хэвлэл мэдээлэл хариуцсан дарга нар мэдээлэл өгөхдөө Д.Одбаяр, Ц.Нанзаддаорж, Ш.Цогтоо нарын бүрэлдэхүүнтэй Үндсэн хуулийн цэцийн Бага суудлын хуралдаан үргэлжилж байгаа талаар албан ёсны мэдээлэл өгсөн.

Үндсэн хуулийн 2.2 дахь хэсэгт аливаа байгуулага, албан тушаалтан Цэц түүний үйл ажиллагаанд хөндлөнгөөс нөлөөлөхийг хориглоно гэж заасан.

Гэтэл хууль тогтоох дээд байгууллага өөрсдөө хууль зөрчсөн үйлдэл хийсээр байгаагийн нэг илрэл нь Ш.Цогтоог чөлөөлөх асуудал хэлэлцэж байгаа нь Цэцийн үйл ажиллагаа цаашлаад гарах шийдвэрт нөлөөлж буй үйлдэл юм.

МАН хоёр дараалан 65, 62 суудал авч, үнэмлэхүй олонх болсондоо эрдэж, хууль шүүхийн байгууллагад нөлөөлж, асуудлыг хуулийн дагуу биш улстөржүүлж шийдвэрлэхээр улайрч байгааг эсэргүүцэж байна. Та бүхэн Үндсэн хуулийн цэцийн Бага суудлын хуралдааны бүрэлдэхүүнд байгаа гишүүнийг чөлөөлөх гэж байгаа бөгөөд 2019 онд хуулийн хугацаа дууссан үед нь чөлөөлөөгүй байж МАН-ын анхаарал хандуулж байгаа асуудлаар болж буй Бага суудлын хуралдааны бүрэлдэхүүнийг эвдэх, солих, хутган үймүүлэх, шийдвэр гаргахад нөлөөлж байгаа ажлаа зогсоохыг шаардаж байна.

Хэрэв энэ мэт шалтаг бүхий үндэслэлээр Цэцийн гишүүнийг солих бол хуулийн хугацаа нь дууссан Д.Солонго, төрийн алба хаах насны дээд хязгаарт хүрсэн 67 настай Н.Чинбат нарын гишүүнийг нэг мөр оруулж хууль хэрэгжүүлэхийг шаардаж байна” гэлээ.

Б.Лхам