С.Зориг агсны амь насыг бүрэлгэсэн хэрэгт сэжиглэгдэн хоригдсон Т.Чимгээг суллахыг шаардаж түүний ах Т.Хүрэлбат Төв талбайд суулт зарлаж, өлсгөлөн зарлаад буй.

Тэгвэл түүн дээр ХЗДХ-ийн сайд Х.Нямбаатар очиж уулзлаа. Тэрбээр “Эрүүл мэндээ болох ёстой. Хаврын цагт өлсгөлөн зарлах нь таны эрүүл мэндэд эрсдэл учирч болзошгүй учраас өлсгөлөнгөө зогсоохыг хүсэж байна. Хоёрдугаарт, цар тахалтай холбогдуулан хорио цээрийн дэглэм сахих үүднээс олон хүн цуглуулах байх нь зүйтэй. Гуравдугаарт, эрүүдэн шүүлттэй холбоотой эрүүгийн хэргийн энэ сарын 31-н Улсын Дээд шүүх хэлэлцэх асуудалдаа оруулсан байна лээ. Үүнээс гарах шийдвэрийг хүлээвэл яасан юм бэ гэдэг саналыг хэлэх гэж ирсэн юм.

Миний хувьд Улсын Дээд шүүхийн эрүүгийн танхимын тэргүүнд Ч.Хосбаярт Эрүүгийн хэрэг хяннан шийдвэрлэх 41 дүгээр зүйлд заасан дөрвөн үндэслэлд тайлбар гаргаж өгөөч гэж албан бичиг явуулсан. Одоогор хариу ирээгүй байна.

Бид С.Зориг агсны амь насыг хөнөөсөн гэх хэргийн гэм буруугийн асуудлыг хөндөж яриагүй. Гагцхүү уг хэрэгт холбогдуулан шүүсэн иргэдэд хүнлэг бус хандсан баримт нь хэвлэлээр цацагдчихаад байхад Үндсэн хуулийн 16 дугар зүйлд заасан хэнд ч эрүү шүүлт тулгахгүй гэсэн суурь зарчмыг зөрчиж эрүүгийн хэрэг хянан шийдвэрлэх ажилагааг явуулсан нэр бүхий албан тушаалтнуудад шүүх гэм бурутайг нь эцэслэн тогтоохгүй 1.6 жилийн хугацаа өнгөрлөө. Энэ асуудалд харамсаж байгаагаа илэрхийлсэн. Ерөнхий сайдын хувьд мөн энэ байр суурийг Т.Чимгээтэй биечлэн уулзахдаа илэрхийлсэн.

Цаашид эрүү шүүлтгүй улс байхын төлөө таны тэмцлийг хүндэтгэж байна. Тиймээс дээр дурдсан гурван зүйлийг хэлэхээр ирлээ” гэв.

Т.Чимгээгийн ах Т.Хүрэлбат “Санаа зовсон танд баярлалаа. Гэхдээ би өлсгөлөнгөө зогсоохгүй. Эрүүдэн шүүсэн нь тодорхой байж байна. Тэр хүн сэтгэл зүйгээрээ үхэж байгаа учраас би өлсгөлөнгөө үргэлжлүүлнэ. Өөр арга байхгүй. С.Зоригийн амь насыг бүрэлгэсэн асуудалд ажилласан бүх шүүгч нар ажлаа хийж яваа. Энэ хүмүүсийг түдгэлзүүлж, шалгаж болдоггүй юм уу” гэлээ.

Дээр дурдсан дөрвөн үндэслэлийн нэг нь хүний эрхийг зөрчсөн гэдэг нь тогтоогдвол өмнө нь тогтоосон ялын хэмжээг түдгэлзүүлж, мөрдөн шалгах ажиллагааг дахин эхлүүлэх аж.

А.Сүх