УИХ-ын гишүүн Т.Доржханд Ерөнхий сайдад хандан "Цар тахлын улмаас гадаадад гацсан иргэдийг эх орондоо ирэх нөхцөлөөр хангах, бодит дэмжлэг үзүүлэх талаар” тавьсан асуулгын хариуг чуулганы үдээс хойшхи хуралдаанаар сонслоо.
Үүний дараа УИХ-ын дарга Г.Занданшатар үг хэллээ. Тэрбээр “Гадаад байгаа иргэдийнхээ эрхийг хангахын зэрэгцээ дотоодын халдварын нөхцөл байдал зэрэг нарийвчилсан төлөвлөгөөг гаргамаар байна. БНХАУ гэхэд сүүлийн хоёр долоо хоногт дотооддоо халдвар авахгүй барьсан байна. Эдийн засгаа ч өсгөөд, халдвараа ч бариад сайн жишээ болж байна.
Дэлхийн улс орнууд нарийвчилсан төлөвлөгөөнүүдийг гаргаж байна.
Ковидын шинэ эрин үед орж байна. Дэлхийн томоохон орнуудыг бодвол цөөн хүн амтай ч вакцин олж авах асуудал хүндрэлтэй байна. Гишүүд вакцины талаар буруу мэдээлэл түгээх, татгалзах нь өөрсдөө төдийгүй, бусдадаа буруу ухуулга болж байна. Бид вакцинжуулалтын асуудлыг эрчимжүүлэхгүй бол болохгүй.
Хамгийн гол нь иргэд хувь хүний сахилга хариуцлагаа өндөрсгөж байж бид давж гарна. Нөгөө талаас Засгийн газрын гаргасан шийдвэр тууштай, үр дүнд хүрдэг байх хэрэгтэй. Дээр дооргүй хүн бүр хариуцлагатай байж богино хугацаанд халдварын тархалтыг хумьж, давж гарч чадна. Иргэдийн сонор сэрэмж их буурч байна" гэлээ.
Б.Лхам
