Монгол Улсын Ерөнхийлөгч Х.Баттулга сүүлийн үед "улиас унагахаас" хэтрэхээ больжээ. Тэрбээр өчигдөр Үндсэн хуулийн цэцийн гишүүнийг чөлөөлж, томилох тухай УИХ-ын шийдвэрт бүхэлд нь хориг тавихаа мэдэгдсэн.

Арга хэмжээ авах тухай албан бичигт "Монгол Улсын Үндсэн хуулийн Жаран тавдугаар зүйлийн 1 дэх хэсэгт “Үндсэн хуулийн цэц есөн гишүүнээс бүрдэнэ. Тэдгээрийн гурвыг Улсын Их Хурал, гурвыг Ерөнхийлөгч, гурвыг Улсын дээд шүүхийн санал болгосноор Улсын Их Хурал зургаан жилийн хугацаагаар томилно” гэж заасан бөгөөд бүрэн эрхийн хугацаа нь дууссан Монгол Улсын Үндсэн хуулийн цэцийн гишүүн Д.Солонго, Ш.Цогтоо нарыг Улсын дээд шүүхээс санал болгож томилуулсан тул тухайн шүүх дараагийн гишүүнийг санал болгохдоо хэнийг нь чөлөөлөхийг Улсын Их Хуралд тодорхой мэдэгдэх, улс төрийн үзэмжээр хандахаас сэргийлэх, улмаар улс орны тусгаар тогтнол, иргэдийн эрх, эрх чөлөөний баталгаа болсон Үндсэн хуулийн цэцийг хууль зүйн зөрчил, маргаангүйгээр байгуулах шаардлагатай гэж үзэж байна. Энэ хүрээнд Улсын дээд шүүхээс тодруулга авахаар хандаад байна. Иймд Монгол Улсын Ерөнхийлөгчийн үндсэн бүрэн эрхэд хүндэтгэлтэй хандаж, холбогдох арга хэмжээг авна уу” гэжээ. Харин түүний хоригийг хүлээж авахгүй байх магадлал өндөр гэдгийг улс төрийн хүрээнийхэн хэлж буй.

Сүүлийн үед Монгол Улсын Ерөнхийлөгчийн гаргасан санал, хоригийг хүлээж аваагүй. Хамгийн сүүлд гэхэд Ж.Эрдэнэбат гишүүнийг тангараг өргөх ёслолыг хойшлуулах санал гаргасан ч дэмжигдээгүй.

Энэ талаар тэрбээр "Ж.Эрдэнэбат УИХ-ын гишүүний тангараг өргөх гэж байгаатай холбогдуулан үг хэлье. Одоогийн нөхцөл байдлынхаа талаар Ж.Эрдэнэбат өөрөө тайлбар өгөх болов уу гэж бодож байна. Авлигатай тэмцэх нүсэр ажлыг эхлүүлснээс хойш хоёр жил болж байна. Энэ ажил дөнгөж эхэлж байгаа. Ж.Эрдэнэбатын хувьд залуу наснаасаа аймгийн Засаг дарга, Сангийн сайд, Ерөнхий сайд байсан, хариуцлагыг өөрөө ухамсарлах хэмжээний албан тушаал хашиж байсан хүн учраас би зориуд үг хэлж байна. Холбогдоод байгаа эрүүгийн хэрэг нь шүүхээр шийдэгдээгүй байхад яаран сандран тангараг өргөх хэрэг байна уу? Тэртээ тэргүй одоогийн УИХ-ын гишүүдийн талаас илүү хувь нь гэмт хэрэгтэн байна. Гэмт хэрэгтнүүд УИХ-д орж ирж хамгаалагддаг процесс маш эрчимтэй явж байгаа. 2016 оны УИХ-ын сонгуулийн үр дүнд бий болсон парламент ч ийм байсан. Би өнөөдөр ёс зүй ярьж байна. Ж.Эрдэнэбат төрийн өндөр албан тушаалуудыг хашиж явсан залуу хүн байна, тангараг өргөхөө хойшлуулж болохгүй юу" гэдгийг хэлсэн.

Гэвч түүний үг "ҮГ" болоогүй. 

Түүнчлэн АНУ-ын Элчин сайд Ё.Отгонбаярыг эгүүлэн татах асуудлыг хөндсөн ч үндэслэлгүй гэх шалтгаанаар УИХ-ын гишүүд хүлээж авахаас татгалзсан. Мөн УИХ-ын ээлжит бус чуулганыг зарлан хуралдуулах, коронавирусний цар тахалтай холбоотойгоор өрх бүрт нэг сая төгрөгийн дэмжлэг үзүүлэх, төсвийн тухай хуульд хориг тавих зэрэг нэлээд олон санал, санаачлага гаргаж, хориг тавьж байсан ч дэмжигдэж байсан удаагүй. 

Энэ удаад ч мөн Ерөнхийлөгчийг хоригийг хүлээж авахгүй байх магадлал өндөр байгаа аж. 

Б.Баатар