Үндсэн хуулийн цэцийн гишүүнээр Ж.Эрдэнэбулганыг томилсон. Тодруулбал, чуулганы нэгдсэн хуралдаанд оролцсон 65 гишүүний 53 нь Ж.Эрдэнэбулганыг Үндсэн хуулийн цэцийн гишүүнээр томилохыг дэмжсэн юм.

Үндсэн хуулийн цэцийн гишүүнд нэрээ дэвшүүлэхээр 18 иргэн материалаа ирүүлснээс 3 нэр дэвшигч нэрээ татаж, 2 нэр дэвшигчийг төрийн алба хаах насны дээд хязгаарт хүрсэн үндэслэлээр нэр дэвшигчээр бүртгэхээс татгалзаж, үлдсэн 13 нэр дэвшигч дээр санал хураалт явагдсан. Хуралдаанаас нийт шүүгчийн олонхын санал авсан Ж.Эрдэнэбулганыг Үндсэн хуулийн цэцийн гишүүний нэг орон тоонд санал болгож, УИХ-д мэдүүлсэн бөгөөд ийнхүү олонхийн саналаар Үндсэн хуулийн цэцийн гишүүнээр томилсон. 

Үндсэн хуулийн цэцийн гишүүнээр томилогдсон Ж.Эрдэнэбулган гэж хэн бэ?

Жуужаагийн Эрдэнэбулган нь 1970 онд Дундговь аймгийн Мандалговь суманд төрсөн, эхнэр, хоёр хүүхдийн хамт амьдардаг. 1988 онд Дундговь аймгийн арван жилийн дунд сургууль, 1994 онд МУИС-ийн Нийгмийн ухааны факультетийн Хууль зүйн дээд сургуулийг эрх зүйч мэргэжлээр төгсөж, 1995 онд хууль зүйн ухааны магистр, 2012 онд хууль зүйн ухааны докторын зэрэг хамгаалжээ. Жуужаа овогтой Эрдэнэбулган нь эрх зүйч, хуульч мэргэжилтэй. Дундговь аймгийн шүүхээс ажлын гараагаа эхлүүлж, МУИС-д олон жил багшаар ажилласан, хуулийн салбартаа мэргэшсэн нэгэн юм.  Тэрбээр МУИС-ийн Хууль зүйн сургуулийн захирал, Хууль зүйн ухааны доктор (Ph.D), профессор. Цаашлаад,

-1996 оноос  Монголын Өмгөөлөгчдийн Холбооны гишүүн, өмгөөлөгч

-2013 оноос  Монголын Хуульчдын Холбооны удирдах зөвлөлийн гишүүн,

-2013-2015 он Монголын Хуульчдын Холбооны  Хуульчийн мэргэжлийн шалгалтын асуудал хариуцсан хорооны дарга, гишүүн,

-2013-2014 он  МУИС-ийн Эрдмийн зөвлөлийн гишүүн,

-2015-2018 он   Нотариатчийн мэргэшлийн хорооны гишүүн.

-2017 оноос   Шинжлэх Ухааны Академийн Бага чуулганы гишүүн,

-2017 оноос  Хууль зүйн докторын ажил хамгаалуулах зөвлөлийн нарийн бичгийн даргаар тус тус ажиллаж иржээ.

Б.Баатар