Шадар сайд С.Амарсайхан ХӨСҮТ-ийн эмч, эмнэлгийн ажилтнууд коронавирусний PCR шинжилгээг хуурамчаар үйлддэг. Тус эмнэлэгт ажилладаг эхнэр нь нөхрийнхөө өмнөөс шинжилгээ өгч, нөхөр нь хөдөө, орон нутгаар хэсч явдаг талаарх мэдээллийг дэлгэсэн билээ. Мөн шинжилгээний сөрөг гэсэн хариуг 80 мянган төгрөгөөр зардаг, эмнэлгийн эмч, ажилтнууд сөрөг гэсэн хариуг өдөрт олноор нь “үйлдвэрлэдэг” гэх мэдээлэл нийгэмд тарж, олныг бухимдуулсан.

Тэгвэл энэ асуудлыг ХӨСҮТ-ийн Үйлдвэрчний хорооны дарга О.Баатарчулуун үгүйсгэж, хэргийн эзнийг олох ажлын хэсэг байгуулан ажилласан ч олоогүй талаар хэлж байна. Нөгөөтэйгүүр, нөхрийнхөө өмнөөс нэг удаа шинжилгээ өгсөн ажилтан тухайн үед тус байгууллагад харьяалалгүй,  өмнө ажиллаж байсан аж. Тэрбээр танил талаасаа гуйн шинжилгээг өгсөн гэдгийг тогтоосон байна.

Шадар сайдын хувьд энэ мэт хууль бус үйлдлийг шалгуулахаар Эрүүгийн цагдаагийн газарт хандсан тухайгаа УИХ-ын чуулганы танхимд хэлж байсан билээ.

Тэгвэл ХӨСҮТ-ийнхөн  баталж, нотлоогүй мэдээллийг нийгэмд цацаж буйд харамсч байгаагаа илэрхийлэн Шадар  сайд С.Амарсайхан ямар үндэслэлээр ийм мэдээлэл дэлгэснийг шалгуулахаар цагдаагийн байгууллагад гомдол гаргажээ. Цаашлаад эмч, ажилтнуудаа ч шалгуулж,  нэр төрөө цэвэрлэхээр хандсан гэлээ. Цаашлаад улстөрчид өөрсөд рүү нь чиглэсэн олон нийтийн шүүмжээс мултрахын тулд эмч, эмнэлгийн ажилтнуудыг харлуулж, олон нийтийн анхаарлыг өөр зүгт чиглүүлж байна гэж хардаж байгаагаа ч ХӨСҮТ-ийнхөн нуухгүй байна.

Ямартай, Шадар сайд нь ХӨСҮТ-ийн эмч, ажилтнуудыг, харин тэд нь эргүүлээд Шадар сайдыгаа шалгуулахаар цагдаагийн байгууллагад хандсан анхны тохиолдол энэ болж байна.

У.Тэргэл