АН-ын даргад нэр дэвшихийн тулд дэнчингийн 93,7 сая төгрөгийг 24 цагийн дотор цуглуулж дөнгөсөн Ц.Оюунгэрэл тухайн үедээ хоёр хуваагдаад байгаа энэ намыг цэгцэлнэ. Намын даргад өрсөлдөхийн тулд их хэмжээний мөнгөний босго тавихыг болиулна хэмээж байсан. Харин удалгүй дэнчингийн мөнгө 35 сая төгрөг болж, Ц.Оюунгэрэл энэ мөнгийг нь төлөн, харин үлдэгдлийг эздэд нь буцаан өгөхөө мэдэгдсэн юм.

Цар тахлын хүнд энэ цагт нэг өдрийн дотор 100 орчим саяыг цуглуулна гэдэг бардаггүй даваа. Гэвч АН-ын олон гишүүн, дэмжигчид, жирийн иргэд ч Ц.Оюунгэрэлийн дэмжин байгаагаасаа илүүчилсэн. Учир нь, хоёр талдаа гараад буй тус намынхныг эмэгтэй хүний мяндсан ухаанаар зохицуулна хэмээн найдсанаас тэр.

Гэвч АН-ын даргын сонгуульд нэр дэвшээд өвдөг шороодсон Ц.Оюунгэрэл өдгөө харин тэр олон хүний итгэл найдвар, сэтгэлийг “нулимж” сууна.

Тэрбээр 24 цагийн дотор тэр олон саяыг цуглуулж дөнгөсөн нь, 35 сая төгрөгөөр АН-ын даргад нэр дэвшсэн нь зүгээр л их сорилын өмнөх бие халаалт байлаа. Одоо л жинхэнээсээ Ерөнхийлөгчийн сонгуульд өрсөлдөнө хэмээв.

Түүний энэ басамжлал, тохуурхал олон хүний сэтгэлд ус цацаж, харин тэрбээр өөрийнх нь хэлснээр том сорил болох Төрийн тэргүүний сонгуульдаа оноо алдав. Дан эрчүүд төр, улсыг захирч ирлээ. Харин одоо эмэгтэйчүүдийн ээлж болсон гэх Ц.Оюунгэрэлийн пиар ч утгаа алдав бололтой.

"Цахим сонгуульд санал өгсөн 30 мянган санал бол гурван сая санал шиг үнэхээр үнэ цэнэтэй санал байлаа. Миний хувьд нас 50 гарсан, 1960-аад оны төлөөлөл. Би яагаад насаа хэлж байна гэхээр миний өмнө дараагийн даваа үлдсэн. АН-ын даргын сунгаа бол миний хувьд тэрхүү том даваа Ерөнхийлөгчийн сонгуулийн бие халаалт байлаа” гэв. Өөрөөр хэлбэл, АН-аас Ерөнхийлөчид нэр дэвшихээ Ц.Оюунгэрэл хоёр дахиа албан ёсоор зарлалаа.

У.Тэргэл