Өвөрхангай аймгаас сонгогдсон УИХ-ын гишүүд Шадар сайд, УОК-ын дарга С.Амарсайханд ханджээ. Тодруулбал УИХ-ын гишүүн Д.Тогтохсүрэн, С.Чинзориг, Г.Ганболд нар өнөөдөр Монгол Улсын Шадар сайд, Улсын онцгой комиссын дарга С.Амарсайхантай уулзаж, Ковид-19 цар тахлын улмаас Өвөрхангай аймагт үүссэн нөхцөл байдлын талаар ярилцаж, зарим асуудлыг нэн даруй шийдвэрлүүлэхээр болсон байна. 

Өвөрхангай аймагт 2021 оны гуравдугаар сарын 22-нд “Сэмжид Хужирт” рашаан сувилалтай холбоотой халдварын сэжигтэй тохиолдол бүртгэгдэж, 23-нд батлагдсан.

Тиймээс тус аймгийн гишүүд Өвөрхангайд гарсан гурван эх үүсвэртэй халдварын голомтыг хумих, тандалт судалгааг үргэлжлүүлэх, тархалтыг зогсооход шаардлагатай хэд хэдэн асуудлыг ойрын хугацаанд шийдвэрлүүлэх хэрэгтэй байгааг Шадар сайдад уламжилжээ.

Тухайлбал,

Эм, эмнэлгийн хэрэгсэл, хамгаалах хувцас хэрэгслийн нөөцийг нэмэгдүүлэх,

Хужирт суманд ажиллуулж байгаа явуулын PCR шинжилгээний лабораторийг үргэлжлүүлэн 2 хоногийн хугацаанд Бүрд суманд ажиллуулах

Эмч, цагдаа, онцгой байдлын алба хаагч зэрэг халдварын голомтод ажиллаж буй төрийн албан хаагчдыг вакцинжуулалтад нэн яаралтай хамруулах

Цар тахлын дэгдэлт өндөр байгаагаас гамшгаас хамгаалах бүх нийтийн бэлэн байдлын улаан түвшинд шилжсэн сумдад шаардлагатай зарим зардлыг шийдвэрлэх талаар тодорхой саналуудыг Шадар сайдад тавьж, шийдвэрлэх арга замын талаар ярилцжээ. 

Б.Баатар