“Долдугаар сарын 1”-ний хэрэгт буруутгагдаад байсан цагдаагийн экс удирдлагууд өдгөө ШШГЕГ-ын цагдан хорих 461 дүгээр хорих ангийн эмнэлэгт хэвтэн эмчлүүлж байна. Тэдэнд өнгөрсөн зургадугаар сарын 7-нд Сүхбаатар дүүргийн шүүхээс гэм буруутайд тооцон, 2.6-3.6 жилийн хорих ял оноосон юм. Гэвч тэд анхан шатны шүүхийн шийдвэрийг эсэргүүцэн, давж заалдах шатны шүүхэд гомдол гаргасан.
    “Долдугаар сарын 1”-ний хэрэгт буруутгагдаад байсан цагдаагийн экс удирдлагууд өдгөө ШШГЕГ-ын цагдан хорих 461 дүгээр хорих ангийн эмнэлэгт хэвтэн эмчлүүлж байна. Тэдэнд өнгөрсөн зургадугаар сарын 7-нд Сүхбаатар дүүргийн шүүхээс гэм буруутайд тооцон, 2.6-3.6 жилийн хорих ял оноосон юм. Гэвч тэд анхан шатны шүүхийн шийдвэрийг эсэргүүцэн, давж заалдах шатны шүүхэд гомдол гаргасан. Харин давж заалдах шатны шүүх тэдний гомдлыг өнгөрсөн пүрэв гаригт хэлэлцэн, тэдэнд оноосон ялыг хэвээр баталсан. Ингэснээр тэд 2.6-3.6 жилийн оноосон хорих ялыг эдлэхээр болж байна. ЦЕГ-ын үүрэг гүйцэтгэгч, хошууч генерал Ч.Амарболд, хурандаа О.Зоригт, Ш.Батсүх нарын биеийн байдал муу Шастины нэрэмжит гуравдугаар эмнэлэгт хэвтэн эмчлүүлж байсан ч арав хоногийн өмнө тэднийг тус хорих төвийн эмнэлэгт хүргэсэн юм.
   Мөн цагдаагийн удирдлагуудын шүүх хурлаас гадна “Зууны мэдээ” сонины сэтгүүлч Д.Болормаад холбогдох шүүх хурал болж, түүнийг УИХ-ын гишүүн, “Мон-Уран”-ы захирал Б.Наранхүүгийн нэр төрд халдсан хэмээн 8.564.400 төгрөгөөр торгохоор болсон билээ. Сэтгүүлч Д.Болормаа нь бага насны /дунд сургуулийн 14-15 насны сурагчид/ охидын онгон биеийг 400 ам.доллараар худалддаг, худалдан авдаг зохион байгуулалттай гэмт хэргийн сүлжээ байгааг олсон бөгөөд “Мон Уран” компанийн захирал Б.Наранхүүг хэрэгт холбоотой. “Мон Уран”-ы Б.Наранхүү өсвөр насны охидыг садар самуунд уруу татсан хэргээр шалгаж эхэллээ” гарчигтай нийтлэлийг “Зууны мэдээ” сонины 2010 оны 11 дүгээр сарын 8-ны өдрийн 267 дугаарт нийтэлсэн юм. Энэ нийтлэлтэй холбоотойгоор “Мон Уран” компанийн захирал Б.Наранхүү нэр төрөө сэргээлгэхээр шүүхэд хандаад байсан билээ.
    Түүнчлэн өчигдөр Баянзүрх дүүргийн шүүхээс хүн хүчиндэж хөнөөгөөд, цогцсыг нь жорлонгийнхоо нүхэнд хаясан Ж.Нэргүйд 20 жилийн хорих жилийн ял оноов. Тэрээр өнгөрсөн оны зургадугаар сарын 19-нд Баянзүрх дүүргийн 19 дүгээр хороонд 23 настай эмэгтэй Э-г хүчиндэж хөнөөгөөд цогцсыг нь жорлонгийн нүхэнд хаясан юм. Мөрдөн байцаалтын явцад “Хүчиндчихээд явуулах гэсэн чинь хүнд хэлнэ гэхээр нь алчихсан. Шуудайнд хийгээд жорлон руу шидэхэд дуу нь гарч байсан. Тэгээд өтгөнд цогцос нь далдлагдахгүй болохоор хашаандаа байсан үртсээр булсан” хэмээн мэдүүлж байжээ.
    Энэ долоо хоног шүүх хурлаас гадна барилгын асуудал олны анхаарлын төвд байлаа. Учир нь өнгөрсөн даваа гаригт Чингэлтэй дүүргийн нутагт дэвсгэрт байрлах “Тэнгис” кино театрын хажуугийн барилгаас төмөр унаж, 20 настай залуугийн амийг авч одсон. Гэтэл түүнээс хоёрхон хоногийн дараа Хан-Уул дүүргийн гуравдугаар хорооны нутаг дэвсгэр 18 дугаар сургуулийн хажууд шинээр барьж буй “Мандал Алтай” компанийн барилгын зургаан давхраас хоёр залуу унаж бэртсэн юм. Тус осолд өртсөн 19 настай Н.Хосбаярын нугас нь гацаж, нурууны хоёр нугалам гэмтэн, хагалгаа хийхээр болсон. Харин 29 настай Н.Бат-Эрдэнэ Чингэлтэй дүүргийн эмнэлэгт эмчлүүлж байгаа билээ.