“Хонгил”-ын өмгөөлөгч Б.Баасанцогтын улстөрчдийг намнах болоод томоохон гэмт хэргийн хувь заяатай холбоотой төлөвлөгөөнд Б.Хурц нарын гэх  дуулиант хэрэг багтсан.  Б.Баасанцогтын тэмдэглэлд ноцтой олон хэргийн хувь заяаг хэрхэн шийдэхийг товчоор зурагладаг байсан нь ил болж, энэ хэрээр хуулийн байгууллагынхны нэр хүнд шалдаа унасан билээ.  Энэ бүхний дунд нэгэн бичиглэл байсан нь  “Б.Хурц нарт холбогдох хэрэг. Шүүх хурал 2020 оны зургаадугаар сарын 8. Шүүх таслан сэргийлэх арга хэмжээг өөрчлөх, ингэснээр цагдан хорих, эсхүл шүүхийн харьяалал өөрчлөх, хэрвээ шүүсэн нөхцөлд С.Зоригийн хэргийг шинээр илэрсэн нөхцөл байдалд тооцож, шийдвэрлэх” гэсэн байдаг. Энэ дагуу үйл явц өрнөснийг Нийслэлийн прокурорын орлогч асан Г.Эрдэнэбат өчигдрийн “Улаан бал” нэвтрүүлэгт орохдоо хүлээн зөвшөөрлөө.

Тэрбээр өнөөдөр эрүүгийн хэрэг үүсгэн, маргааш нь сэжигтнээр татан, нөгөөдөр яллагдагч, удалгүй хоригдол. Энэ бүхэн гэрлийн хурдаар, бүр хуулийн бүх шат дарааллыг алгасан явж буйд ихэд гайхширч, зохион байгуулалттай гэдгийг ухаарч, ойлгож байсан ч “хонгил”-ын өмгөөлөгч Б.Баасанцогтын хайчин дунд орчихно гэж төсөөлөлгүй явж ирснээ ярилцлагадаа дурдлаа.

Тодотговол, 2020 оны тавдугаар сарын 27-ны өдөр эрүүгийн хэрэг үүсгэн, зургаадугаар сарын 5-нд байцаалтад дуудахад очиж өгчихөөд зуслан руугаа явж байх зуурт мөрдөн байцаагч  араас нь утасдан “Таниар нэг зүйлд гарын үсэг зуруулах гэсэн. Уулзахад шууд яллагдагчаар татсан прокурорын тогтоолд гарын үсэг зуруулсан. Харин зургаадугаар сарын 8-нд прокуророос дуудаад очтол яллах дүгнэлт үйлдэн хэргийг шүүхэд шилжүүлсэн” гэлээ.

Олон жил, сараар гацдаг, сунжирдаг  шүүхийн үйл явц хүсвэл, хэдхэн хоногт өрнөдгийг эндээс харж болно. Хэргийн 40 гаруй хавтаст 80 хуудас  материалыг уншихад дор хаяж нэг сар зарцуулах атал  амралтын хоёр хоногийг оруулаад долоо хоногт уншиж, уг хэргийг зургаадугаар сарын 11-нд хавтаст хэрэгт зарим нэг засвар хийсэн болоод маргааш нь буюу 12-нд хэргийг шүүхэд шилжүүлсэн байна.

Харин Г.Эрдэнэбат Б.Баасанцогтын “хонгил”-д чирэгдэн орсноо, Төв аймгийн шүүхийн гадна өнгө өнгийн самбар, уриа лоозон, жагсаал цуглаан, цагаан хоолой. Энэ бүхэн цаанаасаа л зохион байгуулалттай гэдгийг мэдэрч байсан ч салбарынхаа нэгний урхинд орно чинээ санаагүй аж. 

Үүнээс Б.Баасанцогт гэгчийн мутар хаа хүрдгийг, хуулийн байгууллага ялзарсныг тодоос тод харж болохоор байна.

У.Тэргэл