Монгол Улсын 31 дэх Ерөнхий сайд У.Хүрэлсүхийн Засгийн газар хоёр сар гаруйн өмнө бүрэн бүрэлдэхүүнээрээ огцорсон. Тэдний суудлаасаа буух гол шалтгаан нь коронавирусний цар тахлын үед нялх биетэй эмэгтэйд хүнлэг бус хандаж, нимгэн халаад, гэрийн шаахайтай хөхөө өвлийн хүйтэнд гадагш авч гарч, зөөвөрлөсөн явдал байсан.

Тэгвэл энэ удаад Шадар сайд, Улсын Онцгой комиссын дарга С.Амарсайхан огцрох болзлоо хангав.

Тодотговол, түүний хадам аав, ээж хоёр коронавирусний халдвар авч өдгөө ХӨСҮТ-д хэвтэн эмчлүүлж байгаа аж. Тэднийг сахихаар С.Амарсайханы гэргий Ч.Ичинхорлоо тус эмнэлэгт очиж нэг хоног болсон ч орчин нөхцлийг нь голж, улмаар "арын хаалга"-аар гарч, халдвар хамгааллын дэглэм зөрчжээ.

Угтаа халдварын голомт болсон улаан бүсэд орсон бол 14 хоног тусгаарлагдан, халдвар хамгааллын дэглэм мөрдөх учиртай. Халдварын голомтод ажиллаж байгаа эмч, эмнэлгийн ажилчид ч энэ журмыг мөрддөг. Гэтэл "босс"-ын гэргий тусгаарлагдах нь бүү хэл өдгөө гадуур "зугаалж" явна. 

Эрүүгийн хуулийн 15.6 дугаар зүйлийн нэгдүгээр хэсэгт "Бусдын амь нас, эрүүл мэндэд аюул учруулж болзошгүй халдварт өвчний үед эрх бүхий байгууллага, албан тушаалтнаас тогтоосон хорио цээр, хязгаарлалтын дэглэм, холбогдох бусад журам, заавар, шаардлагыг зориуд санаатайгаар зөрчиж халдварт өвчин тархах нөхцөл бүрдүүлсэн, эсхүл бусдад халдаасан бол хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ" гэх хуулийн заалт ч бий.

Гэтэл халдварын голомт, коронавирусний халдвараар хүндээр өвчилсөн хүмүүсийг эмчилж буй улаан бүс болох ХӨСҮТ-д очиж нэг хоночихоод "Шинжилгээний хариу сөрөг гарсан" гэх шалтгаанаар ард түмэнийг хуурч үл болно. Коронавирусний халдвар авсан хүн эхний шинжилгээгээр бус хоёр, гуравдахь давтан шинжилгээгээр ч халдвартай болох нь тогтоогддог. Тэгэхээр улаан бүсэд хоносон сайдын гэргийгээс ч халдвар илрэхийг үгүйсгэхгүй. 

Харин энэ талаар Шадар сайд, УОК-ын дарга С.Амарсайхан "Бүх зүйл халдвар хамгааллын дэглэмээ баримталж явж байгаа. Шинжилгээгээ өгсөн. Хариу нь сөрөг гарсан. Үүнд ямар нэгэн зөрчил дутагдал гаргасан асуудал байхгүй учир эрсдэл үүсгээгүй. Сахиураар очсон нь үнэн. Өөрөө вакцин хийлгэсэн байсан учир урвал өгч, буцаж тусгаарлагдсан. Хариу нь сөрөг гарсан учир одоо ХӨСҮТ-тэй холбоотой асуудал байхгүй гэж ойлгож болно" гэх зүйлийг хээвнэг ярьж сууна.  

Түүний хэлж буйгаар сайдын эхнэрийнх нь шинжилгээний хариу сөрөг гарсан бол "Улаан" бүсэд орж хоносон нь ч түүнд нөлөөлөхгүй бололтой. Тэгвэл ар гэр амьдралаа умартан зүтгэх эмч, эмнэлгийн ажилчид ч мөн үүрэгт ажлаа дуусгаад шинжилгээ өгөөд шууд гэртээ харьж яагаад болохгүй гэж. 

Халдвар хамгааллын дэглэм мөрдөх хэрэгтэй гэж уухайлан хашгирч, том дуугарч суудаг эрхэм дарга нар энэ мэтээр ялгавартайгаар халдвар хамгааллын дэглэм мөрдвөл коронавирусний цар тахлыг монголчууд бид даван туулж дөнгөхгүй. Үүнээс үүдэж маш их хохирол амсах нь гарцаагүй. Өдгөө ч халдварын тохиолдол 400, 500-гаараа бүртгэгдэж, эх үүсвэр нь тодорхойгүй халдвар гарсаар буй.

Тэдний бас нэгэн эх уурхай нь ч энэ мэт дарга нарын арын хаалганы хүмүүсээс гарсан байхыг үгүйсгэхгүй юм.

Шадар сайд, УОК-ын дарга С.Амарсайхан эхнэрийнхээ дээрх үйлдэлд хүлцэл өчиж, суудлаасаа огцрох хэмжээний шалтгаан яах аргагүй мөн. Түүнээс ийм хэмжээний ёсзүйг ч ард түмэн шаардаж байна.

Б.Баатар