УИХ-ын чуулганаар Хүний эрхийн үндэсний комиссын тухай хуульд нэмэлт өөрчлөлт оруулах тухай хуулийн төслийг хэлэлцэж буй юм. Энэ үеэр  гишүүд үг хэллээ.

Тухайлбал, УИХ-ын гишүүн Н.Алтанхуяг “ХЗДХ-ийн сайд Х.Нямбаатар С.Зоригийн амь насаа алдсан хэрэгтэй холбоотой хэргийн бичлэгүүдийг нууцаас гаргасан гэж жиргэсэн байна. Мэдээж, нууцаас гаргах нь чухал ач холбогдолтой. Энэ хэргийг олон жил улстөржүүлж ирлээ. Нууцаас гаргаснаар хэргийг нэг тийш нь шийдэх болов уу гэж найдаж байна. Т.Чимгээ, Б.Содномдаржаа нарыг хуулийнх нь дагуу сулламаар байна.

1998 онд энэ хэрэг гарснаас хойш олон хүн олон удаа шоу хийсэн. ЦЕГ-ын даргаар ажиллаж байсан Д.Мөрөн гэхэд л 2000 оны сонгуулийн өмнө “Сонгуулийн маргааш энэ хэрэг илэрнэ” гэж шоудан, тэр үеийн МАН 74 суудал авч байсан.Энэ завсар 2003 онд Д.Энхбат гэдэг хүнийг Франц улсаас авчирч эрүүдэн шүүсэн. Сүүлд 2015 онд энэ хэдэн хүнийг сэжиглэж, мөрдөн мөшгиж эхэлсэн. Энэ хэргийг өмнөх Засгийн газрууд яагаад илрүүлээгүй вэ гэдгийг ард түмэн асууж байна.

Т.Чимгээ, Б.Содномдаржаа нарыг ид шалгаж байх үед Ерөнхийлөгч Ц.Элбэгдорж, Засгийн газрын тэргүүн нь Ч.Сайханбилэг, Шадар сайд У.Хүрэлсүх, Хууль зүй, дотоод хэргийн сайд Д.Дорлигжав, Сангийн сайд Ж.Эрдэнэбат, шоронгийн дарга нь Б.Билэгт, Улсын Дээд шүүхийн Ерөнхий шүүгч нь Ц.Зоригт байсан" гэв. 

У.Тэргэл