УИХ-ын гишүүн асан Н.Номтойбаярыг өнөөдөр суллажээ. Энэ тухайгаа тэрбээр цахим хуудастаа "Та бүгд сайн байна уу. "Улс төрийн хөл хорио"-нд 307, ажилласны шагналд +57 хоног авч, хилс ялыг шоронд дуусгав. Надад итгэсэнд баярлалаа. Таны зөв гэдгийг би удахгүй батална. Би Та бүгдийн адил сураггүй болсон шударга ёс, шуналгүй, өсгүй, ёс зүйт улс төрөөр маш их цангаж байна" гэжээ. 

УИХ-ын 2020 оны ээлжит сонгуульд Хан-Уул дүүрэгт бие даан нэр дэвшин өрсөлдөж байхад нь Н.Номтойбаярыг саатуулж, анхан шатны шүүхээс түүнд 5.5 жилийн ял оноож, нийтийн албанд томилогдох эрхийг таван жилийн хугацаатай хасах шийдвэрийг гаргасан . Харин Улсын Дээд шүүх уг хэргийг хянан хэлэлцээд хорих ялынх нь хугацааг нэг  жил болгон өөрчилсөн билээ. Мөн Н.Номтойбаярыг  магадлангаар хугацаанаас нь өмнө суллах гэхэд тэрбээр “Хилсээр оноосон ялыг дуустал нь эдлээд гарна” хэмээж байсан билээ.

У.Тэргэл